Líf Magneudóttir bar sigur úr býtum í baráttunni um oddvitasæti Vinstri grænna í Reykjavík fyrir komandi sveitarstjórnarkosningar. Þetta kemur fram í tilkynningu frá Vinstri grænum í Reykjavík um niðurstöðu forvals félagsins.

Metþátttaka var í forvalinu en alls greiddu 1.093 atkvæði, eða 42 prósent þeirra sem voru á kjörskrá. Kosið var um efstu þrjú sæti á sameiginlegum lista Vinstri grænna og Vors til vinstri fyrir kosningarnar í vor.

Líf hlaut 496 atkvæði í 1. sæti og tryggði sér þannig efsta sætið. Finnur Ricart Andrason, sem einnig sóttist eftir oddvitasætinu, hafnaði í þriðja sæti. Hann hlaut 644 atkvæði í 1.–3. sæti.

Stefán Pálsson, sem sóttist eftir öðru sæti, náði því markmiði og varð í öðru sæti með 549 atkvæði í 1.–2. sæti.

Þrjú atkvæði voru auð og eitt ógilt.

Fram kemur í tilkynningunni að skipuð verði sameiginleg kjörnefnd Vinstri grænna í Reykjavík og Vors til vinstri sem muni móta tillögu að sameiginlegum framboðslista félaganna til borgarstjórnar í vor.