Fjórir af hverjum tíu Íslendingum líta á Bandaríkin sem andstæðing, samkvæmt nýrri könnun Maskínu.

Færri, eða 32%, telja að Bandaríkin séu bandamaður Íslands og fjórðungur svarenda kveðst ekki vita.

Þrátt fyrir þetta er Ísland með varnarsamning við Bandaríkin og í varnarbandalagi með landinu.

Maskína spurði: Eins og staðan er í dag, myndir þú lýsa Bandaríkjunum sem bandamanni eða sem andstæðingi?

Svör Íslendinga eru nokkuð frábrugðin svörum Dana í sams konar könnun nýlega.  Þá sögðust 60% Dana líta á Bandaríkin sem andstæðing, en aðeins 17% sem bandamann.

Mikill munur er á milli hópa í íslensku könnuninni. Þannig líta 49% kvenna á Bandaríkin sem andstæðing, en aðeins 32% karla.

Þau sem hafa hærri tekjur eru sömuleiðis með minni áhyggjur af Bandaríkjunum en tekjulægri. 37% þeirra sem hafa tekjur yfir 1,2 milljón króna sjá Bandaríkin sem andstæðing, en 48% þeirra sem hafa frá 550 þúsund krónum til 800 þúsund króna í heimilistekjur.

Aðeins 10,6% kjósenda Miðflokksins líta á Bandaríkin sem andstæðing, en 57% kjósenda Samfylkingarinnar, svo dæmi séu tekin.