Fór 68 sinnum í pontu vegna veiðgjalda

Halla Hrund Loga­dóttir, þing­maður Fram­sókn­ar­flokks, steig 68 sinnum í pontu til þess að ræða frum­varp um veiði­gjöld sem sam­þykkt var á loka­degi Alþingis 14. júlí. Hún seg­ist hafa viljað tjá sig um málið þar sem það varði hennar sér­svið og í ræðum sínum lagt áherslu á mik­il­vægi auð­linda­gjalda.

Halla Hrund skrif­aði færslu á Facebook við þing­lok þar sem hún sagð­ist ekki hafa tekið þátt í mál­þófi stjórn­ar­and­stöð­unnar vegna máls­ins. Frum­varpið var rætt í yfir 162 tíma á Alþingi og varð þar með það mál sem lengst hefur verið rætt síðan Alþingi varð að einni mál­stofu árið 1991.

„Eins og margir vita ákvað ég per­sónu­lega að taka ekki þátt í mál­þófi stjórn­ar­and­stöð­unnar,“ skrif­aði hún. „Skoðun mína á mál­inu tjáði ég hins vegar skýrt í nokkrum ræðum á þingi, á fundum og í fjöl­miðlum. Sú skoðun er í anda þess sem ég hef lengi talað fyrir í orku­mál­unum: Það er eðli­legt að nýt­ing tak­mark­aðra nátt­úru­auð­linda færi þjóð­inni arð og hann á að aukast. Þess vegna styð ég mark­mið rík­is­stjórn­ar­innar um að auka ábata þjóð­ar­innar af sjáv­ar­út­vegi. Það er mik­il­vægt, og rétt áhersla sem ber að fagna.“

Flestar ræður Höllu Hrundar eftir að málþóf var boðað

Erfitt er að segja með vissu hvenær mál­þóf stjórn­ar­and­stöð­unnar til að tefja atkvæða­greiðslu um veiði­gjöld hófst en Jens Garðar Helgason, þing­maður Sjálf­stæð­is­flokks, sagði 20. júní í pontu að það væri „heilög skylda“ and­stæð­inga frum­varps­ins að standa í gegn mál­inu „í allt sumar ef til þarf“.

Fyrir það höfðu ýmsir stjórn­ar­liðar sakað stjórn­ar­and­stöð­una um mál­þóf og starfs­á­ætlun Alþingis felld úr gildi en þingi átti upp­haf­lega að fresta 13. júní. Mál­þóf­inu lauk þegar Þórunn Svein­bjarn­ar­dóttir, for­seti Alþingis, lagði til að 71. grein þing­skap­ar­laga yrði beitt til að tak­marka ræðu­tíma um málið.

Halla Hrund flutti fimm ræður um veiði­gjöld á vor­þingi og 63 andsvör, sem eru styttri ræður sem mega að jafn­aði ekki vera lengri en tvær mín­útur.

Síðast fór hún í pontu vegna máls­ins 2. júlí síð­ast­lið­inn. Steig hún þá 11 sinnum í pontu, fyrst til að flytja ræðu og síðan andsvör. Fór hún síð­ast upp í andsvör kl. 21:49 eftir ræðu Nönnu Mar­grétar Gunn­laugs­dóttur, þing­manns Mið­flokks. Aðeins þing­menn stjórn­ar­and­stöðu­flokk­anna stigu í pontu það kvöldið.

Þá steig hún tvisvar í pontu 30. júní í andsvör og 32 sinnum dag­ana 19. til 21. júní.

Þátttaka í umræðum sé ekki málþóf

Í svari við fyr­ir­spurn Heim­ild­ar­innar ítrekar Halla Hrund að hún hafi ekki tekið þátt í mál­þóf­inu með þessum ræðu­höldum. „Auð­linda­mál eru þunga­vigta­mál sem hafa lang­tíma­á­hrif á sam­fé­lagið,“ segir hún. „Því er mik­il­vægt að taka þátt í þeim og koma sjón­ar­miðum á fram­færi, sér í lagi ef þau tengj­ast sér­sviði þing­manna sem er í mínu til­felli meðal ann­ars auð­linda­nýt­ing.“

„Áhersla mín var á mik­il­vægi auð­linda­gjalda“

Hún segir það eðli­legt og að hlut­verk þing­manna sé að sinna því af natni. „En allt annað er að tefja mál umfram slíkt í marga daga til þess að þau kom­ist ekki í atkvæða­greiðslu,“ segir hún. „Ég hélt fjórar til fimm stuttar ræður og tók þátt í andsvörum sem eru oft­ast 1 mín­úta, eins konar spurn­ingar og svör. Áhersla mín var á mik­il­vægi auð­linda­gjalda sem var sjón­ar­mið sem heyrð­ist minna af í þing­sal og ég hef talað um lengi í sam­hengi við orku­málin.“