Sóttvarnalæknir mun líklega þrengja viðmið um þá markhópa sem ráðlegt er að fara í bólusetningu gegn Covid-19 með nýjum leiðbeiningum í sumar. Fleiri smit hafa greinst undanfarnar vikur en mánuðina á undan.

„Seinni part maí varð vart við væga aukningu á Covid-19 greiningum hérlendis,“ segir í tilkynningu sóttvarnarlæknis í dag. „Í viku 20 (12.–18. maí) greindust 14 einstaklingar. Í viku 21 greindust 24 einstaklingar. Frá áramótum og þar til nú höfðu ekki fleiri en 10 einstaklingar greinst á einni viku.“

Greiningarnar voru gerðar með PCR prófi á veirufræðideildum Landspítala og Sjúkrahússins á Akureyri og eru fyrst og fremst frá bráðamóttökum spítalanna og inniliggjandi sjúklingum en minna frá heilsugæslu.

„Mynstrið nú minnir á vorið 2024 sem var upphaf smitbylgju í júlí og ágúst síðastliðnum. Þá urðu flest smit í viku 28 (8.–14. júlí) þegar 70 einstaklingar greindust. Of snemmt er þó að segja til um hvort sambærileg bylgja er í uppsiglingu en það er hugsanlegt,“ segir í tilkynningunni.

„Lítið bar á alvarlegum veikindum, jafnvel meðal aldraðra einstaklinga“

Nýjustu gögn frá Sóttvarnastofnun Evrópu benda ekki til aukningar á Covid-19 í ríkjum EES. „Þar sem flest sýni sem send eru í Covid-19 rannsókn eru tekin á sjúkrahúsum (bráðamóttöku, legudeildum) þá helst fjöldi greininga í hendur við fjölda inniliggjandi á spítala með Covid-19,“ segir í tilkynningunni. „Gögn frá Landspítala sýna að inniliggjandi einstaklingum með Covid-19 greiningu fjölgaði seinnipart maí í samræmi við ofangreint. Flestir þessara einstaklinga tilheyrðu hópsýkingu á spítalanum meðal sjúklinga og starfsfólks. Sú hópsýking er nú gengin yfir, lítið bar á alvarlegum veikindum, jafnvel meðal aldraðra einstaklinga.“

Þá bárust sóttvarnalækni einnig ábendingar um hugsanleg veikindi víðar í samfélaginu þar sem einstaklingar töldu sig vera með Covid-19. „Mikilvægt er að læknar skrái sjúkdómsgreiningar á Covid-19 í sjúkraskrá, sérstaklega ef greining er ekki staðfest með PCR rannsókn til að sóttvarnalæknir geti vaktað fjölda tilfella og þannig fylgst með þróun smita.“

Þrengja markhópa bólusetninga

Sóttvarnarlæknir segir bóluefni til á landinu og að læknar geti ráðlagt skjólstæðingum, sem þeir telja í sérstakri áhættu, að óska eftir bólusetningu á heilsugæslu ef smitbylgja virðist í gangi jafnvel þótt hún sé bundin við afmarkað svæði og nái ekki að slá út í eftirliti sóttvarnalæknis.

Markhópar bólusetninga þrengjast þó að líkindum þegar nýjar leiðbeiningar sóttvarnalæknis verða birtar síðar í sumar. Aldursviðmið almennrar ráðleggingar hækki þá úr sextugu í áttrætt og skilgreining áhættu byggðri á undirliggjandi heilsufarsvandamálum verði þrengd verulega.

„Hætta á innlögn vegna Covid-19 nú, 5 árum eftir að Covid-19 komst fyrst á kreik hér á landi, virðist að mati smitsjúkdómalækna Landspítala helst eiga við einstaklinga með beinmergsbælingu (vegna sjúkdóms eða beinmergseyðandi krabbameinsmeðferðar) eða aðra mjög mikla ónæmisbælingu, svo sem í kjölfar líffæraígræðslu eða við meðferð með B-frumu eyðandi lyfinu rituximab sem stöðvar alla mótefnaframleiðslu,“ segir í tilkynningunni.