Embætti landlæknis segir fjölda sjálfsvíga á Íslandi vera svipaðan og á fyrri árum. Embættið birti í dag bráðabirgðartölur um fyrstu sex mánuði ársins 2024 og athygli vekur að á þessu tímabili féll enginn undir 20 ára aldri fyrir eigin hendi.

„Fjöldi sjálfsvíga fyrstu sex mánuði ársins 2024 var 22 eða 5,7 á hverja 100.000 íbúa,“ segir í tilkynningu embættisins. „Þessar tölur eru svipaðar fyrri árum en meðalfjöldi sjálfsvíga fyrstu 6 mánuði áranna 2019-2023 var 19 eða 5,3 á hverja 100.000 íbúa. Á þessu fimm ára tímabili, 2019-2023, var fjöldi sjálfsvíga fyrstu 6 mánuði hvers árs á bilinu 15–25 eða 4,3–6,6 á hverja 100.000 íbúa. Á fyrri hluta árs 2024 féll enginn undir 20 ára fyrir eigin hendi.“

Embættið tekur sérstaklega fram að vegna fámennis þjóðarinnar þá geta litlar breytingar á fjölda valdið nokkrum sveiflum í dánartíðni milli ára. „Talsvert miklar sveiflur þurfa að verða til þess að hægt sé að staðhæfa að um marktæka breytingu sé að ræða,“ segir í tilkynningunni. „Því er mikilvægt að túlka ekki 6 mánaða bráðabirgðatölur sem vísbendingu um aukningu eða samdrátt á tíðni sjálfsvíga. Embætti landlæknis vinnur, ásamt fjölda samstarfsaðila, að innleiðingu nýrrar aðgerðaáætlunar til að fækka sjálfsvígum á Íslandi 2025 - 2030 en þar er um að ræða fjölþættar aðgerðir.“

Fólki með sjálfsvígshugsanir er bent á: Píeta samtökin, s. 552-2218, Hjálparsíma Rauða krossins, 1717, og netspjallið 1717.is, Upplýsingamiðstöð heilsugæslunnar, s. 1700, og netspjallið heilsuvera.is. Í neyð hringið í 112.

Varðandi stuðning eftir missi í sjálfsvígi er bent á Upplýsingamiðstöð heilsugæslunnar, s. 1700, og netspjallið heilsuvera.is, Sorgarmiðstöð, s. 551-4141, og sorgarmidstod@sorgarmidstod.is, síma Píeta samtakanna, 552-2218. Í neyð hringið í 112.