Finnur Ricart Andrason, 22 ára odd­viti Vinstri grænna í Reykja­vík­ur­kjör­dæmi norður, hafði ekki erindi sem erf­iði í alþing­is­kosn­ing­unum á laug­ar­dag. Finnur sér ekki eftir því að hafa fært sig úr aktí­vism­anum í Ungum umhverf­issinnum yfir í stjórn­málin en rétt eins og með fram­tíð Vinstri grænna er óvissa um frek­ari þátt­töku hans í stjórn­málum. 

Fyrstu við­brögð Finns við brott­hvarfi Vinstri grænna af þingi eru þakk­læti, von­brigði og ótti. Hann er þakk­látur fyrir traustið sem honum var sýnt að leiða flokk­inn í Reykja­vík ásamt Svandísi Svav­ars­dóttur, for­manni flokks­ins. „En það eru von­brigði að VG náði ekki meiri árangri. Ég var allan tím­ann frekar von­góður um að við myndum ná inn.“ Þá ótt­ast Finnur að umhverfis- og nátt­úru­vernd fái ekki for­gang í næstu rík­is­stjórn. „Þeir tveir flokkar sem hafa haldið uppi þessum mik­il­væga mála­flokki eru ekki lengur inni, Píratar og Vinstri græn. Ég ótt­ast að það verði ekki nógu sterkir málsvarar nátt­úr­unnar inni á þingi.“

Finnur hefur helgað sig umhverf­is­málum og nátt­úru­vernd, hefur lokið grunn­námi í hnatt­rænum sjálf­bærni­vís­indum og starfar sem sér­fræð­ingur í umhverfis- og lofts­lags­málum hjá Sambandi íslenskra sveit­ar­fé­laga. Hann var einnig for­seti Ungra umhverf­is­sinna en sagði sig frá starfi sam­tak­anna þegar hann tók sæti á lista VG. „Mér fannst það heið­ar­leg­ast, bæði gagn­vart Ungum umhverf­issinnum og flokknum.“ Það var ekki auð­veld ákvörðun að taka sæti á lista hjá Vinstri grænum, sér­stak­lega í ljósi rík­is­stjórn­ar­sam­starfs­ins við Sjálf­stæð­is­flokk og Fram­sókn­ar­flokk. „Ég fann að flokk­ur­inn hafði brennt sig á þessu sam­starfi og var klár­lega ekki að fara í þetta sam­starf aftur. Ég fann að það var góð og holl end­ur­nýjun að eiga sér stað og mér þótti mik­il­væg­ara að reyna að taka þátt í að reyna að bjarga flokknum frá því að detta út og taka þátt í að byggja upp traust fólks til flokks­ins upp á nýtt, frekar en að taka þátt í að refsa honum með þeim afleið­ingum að hann dytti út af þingi.“ 

Nýleg ummæli Antonio Guterres, aðal­rit­ara Sam­ein­uðu þjóð­anna, höfðu einnig áhrif á ákvörðun Finns að taka þátt í stjórn­málum. „Hann sagði að það eru stjórn­völd dags­ins í dag sem munu ráða úrslitum hvort við náum mark­miðum okkar í lofts­lags­málum og nátt­úru­vernd eða ekki,“ segir Finnur sem hugs­aði sjálfur í kjöl­farið: „Af hverju ekki að reyna að taka þátt í því að vera stjórn­völd dags­ins í dag og stuðla að þessum mark­miðum?“ 

Þó það hafi ekki tek­ist að þessu sinni og óvissa ríki um fram­tíð Vinstri grænna mun Finnur halda áfram að berj­ast fyrir umhverfis- og nátt­úru­vernd. Hvar og hvenær á hins vegar eftir að skýr­ast. „Það er ákvörðun sem ég er ekki búinn að taka og þarf lengri tíma til að melta, hvort það sé rétti tíma­punkt­ur­inn núna fyrir mig að halda áfram á fullu þar eða hvort ég vilji aðeins taka skref aftur á bak og átta mig á hvað ég vil gera næst,“ svarar Finnur, aðspurður hvort hann muni halda áfram að beita sér innan Vinstri grænna. „En ég finn að ég hef ákveðna sýn á hvernig ég vil að sam­fé­lagið þró­ist og hvernig póli­tíkin gæti þró­ast. Það eru meiri líkur en minni að ég muni taka ein­hvern þátt í stjórn­mál­unum áfram, hvort sem það verði akkúrat núna eða eftir ein­hverja mán­uði eða ár.“