Grátið á kosningavöku VG

„Hjálpaðu mér upp, mér finnst ég vera að drukkna,“ söng trú­bador hástöfum þegar blaða­maður leit við á kosn­inga­vöku Vinstri grænna í Iðnó rétt eftir ell­efu í kvöld. Áður hafði kosn­inga­stjór­inn í Suð­ur­kjör­dæmi stýrt sam­söng þar sem Maí­stjarnan og Græna bylt­ingin ómuðu meðal ann­ars en það síð­ar­nefnda hefur verið ein­kenn­islag flokks­ins í kosn­inga­bar­átt­unni síð­ustu vikur. 

Vinstri græn mæl­ast með 2,3 pró­sent fylgi á lands­vísu þegar fyrstu tölur hafa verið birtar í öllum kjör­dæmum. Verði þetta loka­nið­ur­staðan mun flokk­ur­inn ekki ná inn þing­manni og auk þess mun flokk­ur­inn ekki fá grunn­fram­lag í úthlutun fjár úr rík­is­sjóði til stjórn­mála­sam­taka. Alls þarf 2,5 pró­sent atkvæða til að eiga rétt á grunn­fram­lagi, 12 millj­ónum króna á ári.  

Svandís Svav­ars­dóttir, for­maður Vinstri grænna, flutti hjart­næma ræðu fyrr um kvöldið. Atkvæðin sem flokk­ur­inn hlýtur sam­kvæmt fyrstu tölum telja á nokkrum tugum í hverju kjör­dæmi og það mátti heyra saum­nál detta þegar fyrstu tölur í Suð­vest­ur­kjör­dæmi voru lesnar upp: 100 atkvæði. Á sama tíma supu aðrir hveljur þegar tölur fyrir Mið­flokk­inn og Flokk fólks­ins voru lesnar upp. 

Var bjart­sýnnOrri Páll Jóhanns­son hefur verið þing­maður VG síðan 2021 en tók fyrst sæti á Alþingi sem vara­þing­maður í jan­úar 2017. Hann skipar 2. sæti í Reykja­vík suður en er ekki á leið á þing eins og staðan er núna. Það sama er að segja um alla fram­bjóð­endur flokks­ins.

Mynd: Heim­ildin / Davíð Þór

Orri Páll Jóhanns­son, þing­maður flokks­ins síð­ustu þrjú ár til­kynnir starfs­manni flokks­ins rétt eftir mið­nætti að nú sé hann ekki lengur yfir­maður hennar þar sem hann er nú búinn að missa umboð sitt sem þing­maður og þing­flokks­for­maður. Hann er samt bjart­sýnn. „Ég held að við merjum þetta.“ 

Skömmu síðar eru fyrstu tölur í Reykja­vík suður lesnar upp. Hvorki Svandís né Orri Páll ná inn og útlit er fyrir að Vinstri græn séu að kveðja Alþingi. Þetta er í fyrsta sinn frá stofnun flokks­ins, árið 1999, sem hann fær ekki þing­mann kjör­inn. Stærsti kosn­inga­sigur VG vannst í kosn­ing­unum 2000 þegar hann hlaut 21,68 pró­sent atkvæða og 14 þing­menn kjörna en fæsta þing­menn í kosn­ing­unum 2003, fimm tals­ins. Þar til nú, þegar allt lítur út fyrir að Vinstri græn séu að segja skilið við Alþingi. Að minnsta kosti í bili.

Orri Páll sagði ótíma­bært að ræða hvað taki við hjá honum, eða öðrum þing­mönnum flokks­ins.

Una Torfa­dóttir, dóttir Svan­dísar, treysti sér ekki til að ræða við blaða­mann. Til­finn­ing­arnar voru of miklar. Staðan tók sýni­lega á stuðn­ings­menn og tár féllu í salnum. 

Sjálf var Svandís á leið upp á RÚV rétt eins og odd­vitar allra flokk­anna. Á sama tíma voru frétta­maður og töku­maður RÚV að ganga frá í Iðnó. Það þykir ekki til­efni til að segja frek­ari fréttir frá kosn­inga­vöku Vinstri grænna í nótt.

Hér má nálg­ast töl­fræði um kosn­ing­arnar með nýj­ustu upp­lýs­ingum í graf­ískri fram­setn­ingu á vef Heim­ild­ar­innar.