Engin svör borist frá Bakkavararbræðrum

Verkföll standa enn yfir meðal starfs­manna verk­smiðju Bakka­varar í Spalding í Lincolnshire í Bret­landi. Verk­falls­að­gerðir félags­manna breska stétt­ar­fé­lags­ins Unite the Union hafa staðið yfir í tvo mán­uði.

Fyrr í mán­uð­inum kom hópur á vegum stétt­ar­fé­lags­ins til lands­ins til þess að vekja athygli á kjara­deil­unni með aug­lýs­inga­her­ferð sem margir hafa eflaust séð á flettiskiltum víðs vegar um borg­ina. Stétt­ar­fé­lagið skipu­lagði einnig mót­mæli í sam­starfi við stétt­ar­fé­lagið Eflingu sem fóru fram fyrir utan skrif­stofur bræðr­anna Ágústs og Lýðs Guð­munds­sona á Granda, en þeir eru meiri­hluta­eig­endur Bakka­varar Group plc.

Þá sendi stétt­ar­fé­lagið bræðr­unum bréf þar sem óskað var eftir því að þeir beittu sér fyrir því að leysa úr kjara­deil­unni og koma til móts við kröfur starfs­fólks­ins um betri kjör og bættar vinnu­að­stæður í verk­smiðj­unni. Tals­maður Unite the Union segir í sam­tali við Heim­ild­ina að bræð­urnir hafi enn sem komið er ekki svarað erindi stétt­ar­fé­lags­ins.

Stétt­ar­fé­lagið hefur einnig sent hóptil Aust­ur­ríkis þar sem til stendur að beita annan hlut­hafa Bakkavör Group þrýst­ingi til þess að sker­ast í leik­inn og beita sér fyrir því að samið verði um ásætt­an­leg laun. Unite the Union hefur sagt að flestir starfs­menn verk­smiðj­unnar fái greitt um 11,54 pund á tím­ann, sem eru rúm­lega tvö þús­und íslenskar krónur.

Höfnuðu tilboði Bakkavarar 

Kjara­við­ræður hafa borið lít­inn árangur enn sem komið er. Claire Peden, tals­maður Unite the Union, segir í sam­tali að félags­menn hafi nýlega hafnað til­boði Bakka­varar með miklum meiri­hluta atkvæða­greiðslu.

Claire upp­lýsir að til­boð Bakka­varar hafi hljóðað upp á milli sex til 33 punda hækkun á viku­launum starfs­manna. Sumir myndu því hækka í launum um rúmar 4.000 krónur á mán­uði á meðan þeir sem fengju hæstu launa­hækk­un­ina myndu fá um 23.000 króna hækkun á mán­að­ar­launum sínum.

Þá bauð fyr­ir­tækið öllu starfs­fólki verk­smiðj­unnar 350 punda ein­greiðslu til að greiða fyrir samn­ing­unum. Það eru rúm­lega 61.300 íslenskar krónur.  

WantedAug­lýs­inga­her­ferð stétt­ar­fé­lags­ins er ansi her­ská. Þar er tekið fram að bræð­urnir raki inn millj­ónum með illa laun­uðu starfs­fólki. Borgið okkur, er krafan.

Mynd: /Unite the Union

Þrýsta á Bakka­var­ar­bræðurStétt­ar­fé­lagið Unite th Union hefur reynt að þrýsta á hlut­hafa mat­væla­fram­leiðslu­fyr­ir­tæk­is­ins Bakkavör Group plc. til að beita sér í kjara­deil­unni í Spalding í Bretalndi. Sendi­nefnd kom nýverið til lands­ins til ná athygli Lýðs og Ágústs Guð­munds­sona sem eiga meiri­hluta í fyr­ir­tæk­inu.

Mynd: /Unite the Union

Slitu viðræðum

Claire segir að eftir að félags­menn höfn­uðu til­boði Bakka­varar hafi fyr­ir­tækið brugð­ist við með því að slíta kjara­við­ræð­unum við stétt­ar­fé­lagið með vísan í bresk lög um kjara­deilur og hefj­ast handa við að hafa sam­band við starfs­fólk verk­smiðj­unnar og leggja til­boð sitt fram við hvern og einn starfs­mann verk­smiðj­unnar per­sónu­lega.

Stétt­ar­fé­lagið hafi brugð­ist við þessu með því að til­kynna Bakkavör að félagið hafi end­ur­nýjað kjara­deil­una. Claire segir að félagið muni efna til atkvæða­greiðslu um frek­ari verk­falls­að­gerðir til þess að mót­mæla því sér­stak­lega að fyr­ir­tækið hafi slitið kjara­við­ræð­unum.

„Þetta mun veita félags­fólki okkar laga­lega vernd gegn því að vera sagt upp eftir 20. des­em­ber, þegar slík laga­leg vernd myndi öllu jöfnu renna út,“ segir Claire og bætir við að fjöldi þeirra sem taka þátt í verk­falls­að­gerðum hafi auk­ist eftir þetta útspil Bakka­varar. Nú séu um 480 manns í verk­falli frá því í síð­ustu viku.

Ferja starfsfólk milli verksmiðja

Alls starfa 1.400 manns í verk­smiðju Bakka­varar í Spalding og hefur því rúm­lega þriðj­ungur starfs­fólks verið í verk­falli und­an­farna tvo mán­uði. Verk­fallið hefur valdið þó nokkru raski á starf­semi félags­ins sem hefur komið fram í því að ein­staka mat­vörur sem fyr­ir­tækið fram­leiðir hafa horfið úr hillum í helstu mat­vöru­versl­unum víða um Bretland.

Skortur á grísku ídýf­unni tara­ma­sal­ata hefur vakið mesta athygli þar í landi og hafa fjöl­miðlar í Bret­landi fjallað mikið um þessa vöru, sem var um stund ófá­an­leg í versl­unum á borð við Sainbury’s, Tesco’s, Marks & Spencer og Waitrose.

Í frétt sem birt­ist í breska tíma­rit­inu the Financial Times er skort­ur­inn rak­inn til verk­fall­anna í Spalding. Í þeirri umfjöllun var haft eftir tals­manni Bakkavör Group að rofið í fram­leiðslu væri tíma­bundið og fyr­ir­tækið hafi brugð­ist við trufl­un­inni með því að virkja aðrar verk­smiðjur fyr­ir­tæk­is­ins vinna um fram­leiðsluslak­ann á ein­staka vörum. Bakkavör rekur 20 verk­smiðjur til við­bótar víðs vegar um Bretland og þar starfa sam­tals um 13.500 manns.

Claire segir að Bakkavör sé um þessar mundir að flytja starfs­fólk frá verk­smiðju sinni í bænum Tilm­an­stone til verk­smiðj­unnar í Spalding til að ganga í störf þeirra sem taka þátt í verk­fall­inu. Um er að ræða rúm­lega 280 kíló­metra ferða­lag sem Claire segir að fyr­ir­tækið nið­ur­greiði fyrir starfs­fólkið frá Tilm­an­stone. Ásamt því leggi Bakkavör út fyrir gist­ingu starfs­fólks­ins.

„Þau kjósa að standa straum af þessum kostn­aði í stað þess að veita félags­mönnum okkar verð­skuld­aðar launa­hækk­anir,“ segir Claire.   

Höfða til stjórnmálamanna í aðdraganda kosninga

Claire segir í sam­tali að her­ferð stétt­ar­fé­lags­ins hér á landi sé hvergi nærri lokið og sendi­nefnd á vegum félags­ins muni snúa aftur til lands­ins þangað til að það tekst að semja.

Í til­kynn­ingu sem stétt­ar­fé­lagið sendi frá sér fyrr í vik­unni segir að full­trúar félags­ins muni á næstu dögum funda með íslensku stjórn­mála­fólki.

Í orð­send­ingu sem vinnu­deilu­svið Unite the Union sendi frá sér ávarpar stétt­ar­fé­lagið stjórn­mála­menn á Íslandi og kallar eftir því að við­skipti rík­is­ins við Bakka­var­ar­bræður í gegnum fyr­ir­tæki á borð við tækni­fyr­ir­tækið Origo, sem bræð­urnir eiga hlut í, séu tekin til end­ur­skoð­unar í ljósi fram­göngu þeirra gagn­vart verka­fólki í Englandi.

„Við viljum vekja íslenskt stjórn­mála­fólk til umhugs­unar um hvort þau vilji stunda við­skipti við þessa menn og hvaða sið­ferð­is­kröfur sé eðli­legt að gera til aðila sem hljóta svo stóra samn­inga við ríkið.“