Viðreisn tekur stökk og Píratar mælast utan þings

Flug virð­ist vera á fylgi Við­reisnar sem mælist annar stærsti flokk­ur­inn í nýrri könnun Maskínu. Fylgið mælist 16,2 pró­sent hjá Viðreisn en 15,9 pró­sent hjá Mið­flokki. Munurinn á þeim er þó ekki töl­fræði­lega mark­tækur. Sam­fylk­ingin mælist enn stærsti flokk­ur­inn með 22,2 pró­sent. Flokk­ur­inn heldur áfram að dala, líkt og hann hefur gert í síð­ustu fimm könn­unum. 

Utan þingsÞór­hildur Sunna hefur verið tals­maður Pírata en flokk­ur­inn mælist nú í fyrsta sinn í langan tíma utan þings.

Mynd: Golli

Fylgi Vinstri gænna mælist 3,8 pró­sent, sem er litlu minna en fylgi Sós­í­alista, sem mæl­ast með slétt fjögur pró­sent. Píratar virð­ast hins vegar stefna út af þingi, því fylgi flokks­ins mælist í könnun Maskínu undir fimm pró­senta þrösk­uld­inum. Píratar njóta stuðn­ings 4,5 pró­sent. 

Vinstri atkvæði líkleg til að deyja

Að því gefnu að Vinstri græn og Sós­í­alistar fái ekki kjör­dæma­kjör­inn þing­mann, þýðir það að 7,8 pró­sent af atkvæðum á vinstri vængnum falla niður dauð. 

Samkvæmt mörgum mæli­kvörðum, svo sem kosn­inga­prófi Heim­ild­ar­innar og Stund­ar­innar fyrir síð­ustu kosn­ingar, mætti stað­setja Pírata vinstra megin við miðju líka. Væri það gert, er útlit fyrir að 12,3 pró­sent atkvæða þeirra sem stað­setja sig þeim megin á ásnum skili ekki neinum á þing. 

Græn­ingjar mæl­ast með 0,8 pró­sent og langt frá þing­sæti í könn­unni, en Bjarni Jónsson, þing­maður sem nýlega yfir­gaf Vinstri­hreyf­ing­una grænt fram­boð, gekk til liðs við flokk­inn á dög­unum. 

Til sam­an­burðar er sam­an­lagt fylgi þess­ara flokka, sem ekki njóta nægs stuðn­ings hver fyrir sig til að kom­ast á þing, er ekki nema um einu pró­sentu­stigi undir fylgi Sjálf­stæð­is­flokks­ins. 

Hægri bylgja í kortunum

Svo virð­ist hins vegar vera að hægri bylgja sé í kort­unum. Viðreisn skil­greinir sig sem miðju­flokk en er upp­haf­lega klofn­ings­fram­boð frá Sjálf­stæð­is­flokki, sem lengi var eini hægri­flokkur lands­ins. Mið­flokk­ur­inn er, þrátt fyrir nafnið, nokkuð afger­andi hægri­flokkur og for­maður og stofn­andi Flokks fólks­ins hefur í fyrri kosn­ingum skil­greint flokk­inn sem hægri flokk. 

Sam­an­lagt hafa þessir fjórir flokkar 55,3 pró­sent fylgi í könn­un­inni. 

Til við­bótar má svo telja Lýð­ræð­is­flokk Arnars Jóns­sonar, fyrr­ver­andi vara­þing­manns Sjálf­stæð­is­flokks­ins, sem mælist með 1,6 pró­sent fylgi í könn­un­inni. 

Þeir þrír flokkar sem tala inn á miðj­una, Viðreisn, Sam­fylk­ing og Fram­sókn­ar­flokkur, mæl­ast sam­an­lagt með 45,3 pró­sent.