Er ekki bara best að pakka saman, boða til kosninga og rétta keflið áfram?“ spurði Jóhann Páll Jóhannsson, þingmaður Samfylkingarinnar, við upphaf þingfundar síðdegis. Alþingi kom saman í gær eftir kjördæmaviku og landsfund Vinstri grænna þar sem flokkurinn samþykkti ályktun um að ríkisstjórnarsamstarfið væri að taka enda. Bjarni Benediktsson forsætisráðherra sagði í samtali við Heimildina í gær að ályktunin sé mjög óskýr og segir hann erfiða og flókna stöðu blasa við. 

Þingmenn stjórnarandstöðunnar kepptust við að lýsa yfir endalokum ríkisstjórnarinnar undir störfum þingsins í upphafi þingfundar í dag. Oddvitar ríkisstjórnarflokkanna funduðu stuttlega eftir ríkisstjórnarfund í gær en ekkert liggur fyrir um hvenær gengið verður til kosninga á næsta ári, en það verður í síðasta lagi næsta haust. 

Guðbrandur Einarsson, þingmaður Viðreisnar, segir ríkisstjórnina vera í líknandi meðferð. Hann gagnrýndi lækkun á framlagi ríkissjóðs til jöfnunar á örorkubyrði lífeyrissjóða, sem hann segist beinast að sjóðum sem verkafólk hefur greitt í. „Fólkið sem hefur haft lægstu launin í gegnum starfsævina og á þar af leiðandi minnstu lífeyrisréttindin. Í mínum huga er það óskiljanlegt hvers vegna ríkisstjórnin velur að fara þessa leið til að fjármagna aðra þætti fjárlagafrumvarpsins sem Vinstri græn hampa og skreyta sig með.“ Guðbrandur segir þessa forgangsröðun sýna að ríkisstjórnin hafi ekki getu til að forgangsraða í þágu fólksins í landinu: „Þess vegna á hún að fara frá.“

Líkti ríkisstjórnarsamstarfinu við trúðasýningu

Jóhann Páll spurði í ræðu sinni hvað ríkisstjórnin ætlaði að eyðileggja mikið áður en hún hrökklast frá. Hann tók upp þráðinn frá því í gær þegar hann steig í pontu og sagði samstarf ríkisstjórnanna þriggja orðið að trúðasýningu og það væri í raun rangnefni að kalla hana ríkisstjórn.

„Ég fjallaði í gær um fórnarkostnaðinn af því að halda ríkisstjórnarsamstarfinu gangandi, fórnarkostnaðinn fyrir fólkið í landinu af því að sitja uppi með ríkisstjórnina enn einn veturinn og enn eitt fjárlagaárið með tilheyrandi óstjórn í efnahagsmálum, velferðarmálum, samgöngumálum og svona mætti lengi telja.“ Jóhann Páll sagði ríkisstjórnina virðast ætla að hanga saman, að minnsta kosti fram yfir 25. janúar þegar árleg úthlutun fjár úr ríkissjóði til stjórnmálaflokka fer fram. Þar munu ríkisstjórnarflokkarnir fá hæstu framlögin. 

Flokksbróðir hans og fyrrverandi formaður Samfylkingarinnar, Logi Einarsson, segir upplausn vera í ríkisstjórnarsamstarfinu, það hafi blasið við í marga mánuði. „Við getum einfaldlega ekki búið við þrjár ólíkar ríkisstjórnir í landinu á sama tíma. Nú verða þessir flokkar þrír einfaldlega pakkað saman, slíta samstarfinu og boða til kosningar áður en þeir valda enn þá meira tjón fyrir þjóðinni.“