„Við ræddum málið frá mörgum sjón­ar­hornum og það var mjög mik­il­vægt að það var orðið við þess­ari ósk okkar í VG að málið yrði tekið á dag­skrá og rætt,“ sagði Svandís Svav­ars­dóttir, inn­við­a­ráð­herra, eftir rík­is­stjórn­ar­fund sem lauk skömmu fyrir hádegi en þar var rætt um mál hins ell­efu ára Yazans Tamimi sem vísa átti úr landi í gær en brott­vís­unin stöðvuð af dóms­mála­ráð­herra á síð­ustu stundu. 

Svandís segir mál hins palest­ínska Yazans, sem glímir við tauga­hrörn­un­ar­sjúk­dóm­inn Duchenne, „rífa í hjartað“. Málið var á dag­skrá rík­is­stjórn­ar­fundar í morgun að beiðni Vinstri grænna. 

Ráðherrar ekki á sömu blaðsíðu

Svandís segir fund­inn hafa verið gagn­legan og fjöl­breytt sjón­ar­mið undir. „Það er ekki þannig að allir ráð­herrar rík­is­stjórn­ar­innar séu nákvæm­lega á sömu blað­síðu í þessu máli,” segir hún. 

Spurð hvað hún eigi við með því að ekki séu allir á sömu blað­síðu segir Svandís: „Það er ekk­ert sem kemur á óvart. Það er það sem kemur fram bara í við­tölum við okkur,” segir hún. 

Á fund­inum hafi þau rætt málið sér­stak­lega út frá hags­munum barna og út frá hags­munum þeirra sem sæta lög­reglu­að­gerð á meðan þeir eru inniliggj­andi á sjúkra­húsi. Deildar mein­ingar hafi verið um þetta en í grunn­inn hafi sam­talið á fund­inum verið gott. 

Fund­ur­inn leiddi hins vegar ekki af sér neina eig­in­lega nið­ur­stöðu í máli Yazan. „Það er nátt­úr­lega ekki á borði rík­is­stjórn­ar­innar í sjálfu sér að taka ákvarð­anir um það en um leið þá held ég öllum sé ljóst að það sax­ast á þann tíma sem líður þar til Yazan og hans fjöl­skylda eigi rétt á efn­is­með­ferð,“ segir Svandís.

Ríkisstjórnin muni standa málið af sér

Eru ein­hverjar líkur á því að rík­is­stjórni geti fallið út af þessu máli?

„Mér fannst það ekki á þessum fundi. Það er auð­vitað mik­ill hiti í þessu máli, en við erum nátt­úru­lega eldri en tvæ­vetur og höfum gengið í gegn um mörg erfið mál, þessi rík­is­stjórn. Við þekkj­umst mjög vel og vitum út á hvað helstu átaka­línur ganga. Við höfum farið í gegn um flókn­ari og þyngri póli­tísk mál heldur en þetta. Hins vegar er þetta mál sem rífur í hartað á manni og er þess vegna dálítið á öðrum skala heldur en margt annað sem við erum að ræða,“ segir Svandís. 

Hún leggur áherslu á að rík­is­stjórnin og stjórn­mála­menn gæti vel að því að sinna þeim hlut­verkum sem þeir eru kjörnir til að sinna, og fram­fylgja lögum: „En við sem erum í stjórn­málum megum ekki gleyma því að við erum líka mann­eskjur.“

Eruð þið sátt við málið eins og það stendur núna?

„Ég held að þetta hafi verið til mik­ils gagns.“

Hefurðu áhyggjur af rík­is­stjórn­ar­sam­starf­inu út af þessu máli?

„Nei, ekki út af þessu máli.“ 

Út af öðrum málum?

„Já, já, þessi rík­is­stjórn er nátt­úru­lega þannig að hún þræl­ast í gegn um hvað sem er þannig að ég held að hún sé löngu vaxin upp úr því að maður sé að hafa ein­hverjar sér­stakar áhyggjur af henni.“