„Ég kynn­ist Guðrúnu Karls Helgu­dóttur og við förum að tala saman um góðar hug­myndir um fram­tíð kirkj­unnar og úr verður að ég hoppa þarna inn með henni, tíma­bundið þó.“

Þetta segir Heimir Hann­es­son, nýr sam­skipta­stjóri þjóð­kirkj­unnar, í sam­tali við Heim­ild­ina. „Það er bara frá­bært að vinna hjá þjóð­kirkj­unni. Bjartur andi. Það er ekki á mörgum stöðum þar sem maður fær að skipu­leggja bisk­ups­vígslu, við getum orðað það þannig,“ segir hann kím­inn.

Kynntist biskupi í aðdraganda biskupskjörs

Heimir tók þátt í kosn­inga­bar­áttu Guðrúnar Karls Helgu­dóttur, nýkjör­ins bisk­ups, og það var í aðdrag­anda hennar sem þau kynnt­ust. 

Spurður hvernig hann hafi endað á því að starfa fyrir kosn­inga­bar­áttu í bisk­ups­kjöri segir Heimir að það sé góð spurn­ing. „Þetta er bara gamla íslenska maður á mann.“ Hann bætir því við að ekki margir bjóði sig fram til bisk­ups og ekki heldur margir sem hafi ein­lægan áhuga á að taka þátt í kosn­inga­bar­áttu til að koma áherslu­málum sem þeim þyki vænt um til skila.

„En það var ekki bara ég, heldur var hópur sem taldi örugg­lega upp undir 100 manns að baki Guðrúnu. Ég var nú bara einn af þeim.“ Um var að ræða sjálf­boða­liða­starf.

Markmið að koma starfi kirkjunnar betur til skila til almennings

Heimir segir að hlut­verk hans verði að móta stöðu sam­skipta­stjóra í breyttum heimi sam­skipta. Staðan hafi verið til innan kirkj­unnar áður en nú verði hún í dálítið breyttri mynd.

„Það er nátt­úru­lega allt annar gangur í sam­skipta­málum í dag en var fyrir örfáum árum. Þetta breyt­ist svo hratt. Það er verið að nota svo­lítið þetta tæki­færi með þess­ari tíma­bundnu ráðn­ingu að móta það starf sem verður til eftir ár,“ segir hann.

Blm: Þannig að þetta er eitt­hvað sem þið Guðrún hafið verið að pæla í – hvert þið viljið fara með þessa ákveðnu stöðu og þú ert þá feng­inn inn til þess að leiða það dálítið til lykta?

„Já, einmitt,“ segir Heimir.

Mark­miðið sé að auka sýni­leika þeirra starfa sem kirkjan vinnur.

„Það er heil­mikið að ger­ast í kirkj­unni sem fólk veit ekki af eða heyrir lítið frá. Þannig að það er alveg kom­inn tími til þess að end­ur­skipu­leggja svo­lítið sam­skipta­ferl­ana þannig að það verði auð­veld­ara fyrir Guðrúnu og alla innan kirkj­unnar að segja frá því hvað þeir eru að gera og fá fólk til liðs með sér í því.“

Kirkjan er að sögn Heimis stór hluti af sam­fé­lag­inu en alltof hljóð­látur. „Mark­miðið næsta árið hjá mér er að búa til strúktúr utan um sam­skipta­mál kirkj­unnar þannig að við getum betur komið þessu mik­il­væga starfi til skila til almenn­ings.“