Kosið var um nýjan biskup Íslands síðastliðinn þriðjudag. Um var að ræða síðari umferð biskupakosninganna þar sem valið stóð á milli séra Guðrúnar Karls Helgudóttur, sóknarprests Grafarvogskirkju og séra Guðmundar Karls Brynjarssonar, sóknarprests Lindakirkju.
Guðrún vann kosningarnar með rúmlega 52 prósent greiddra atkvæða. Samkvæmt tilkynningu sem Þjóðkirkja sendi frá sér voru 2.286 skráðir á kjörskrá, þarf af voru 166 prestar og djáknar og 2.119 svonefndir leikmenn.
Guðrún verður fimmtándi biskup Íslands frá því að Skálholts- og Hólabiskupsdæmin voru sameinuð árið 1801. Þá er hún önnur konan í sögu kirkjunnar til þess að gegna embættinu, á eftir forvera sínum, Agnesi M. Sigurðardóttur.
Guðmundur Karl, sem laut í lægra haldi með tæp 47 prósent greiddra atkvæða, segist, í samtali við Heimildina, ganga sáttur frá borði.
„Mér líður bara afskaplega vel. Ég er fyrst og fremst þakklátur fyrir þessa skemmtilegu ferð sem mér var boðið í. Ég er þakklátur fyrir að fá að fara út um landið og kynnast fjölda fólks sem ann kirkjunni og vill henni vel. Þetta er búið að vera mikill skóli og lærdómur sem ég kem til með að búa að og verð alltaf þakklátur fyrir að hafa tekið þátt í.“
Nóg af verkefnum fram undan
Aðspurður hvað taki næst við hjá honum að loknu biskupskjöri segist Guðmundur Karl munu snúa aftur til fyrri starfa í Lindakirkju. Þar bíði hans fjölmörg verkefni sem hafi hrannast upp á meðan framboðið stóð yfir.
„Ég er sóknarprestur í stórri sókn og það verður að segjast eins og er að í þessu brölti mínu þá hefur mætt meira á kollegum mínum sem hafa verið hérna að sjá um safnaðarstarfið. Þannig ég kem náttúrlega bara tvíefldur til baka í það. Þannig það er nóg af verkefnum fram undan. Ég hef að góðu að hverfa aftur.“
Spurður álits á nýkjörnum biskup segist Guðmundur Karl þykja vænt um Guðrún Karls. Hann biður nýjum biskup blessunar og óskar henni góðs gengis í þeim verkefnum sem fram undan eru. „Ég veit hún mun leggja sig fram,“ segir Guðmundur Karl.
Kannast við orðróm um að pólitík hafi litað biskupskjörið
Í aðdraganda seinni umferðar biskupskjörsins barst Heimildinni ábending um að kosningavél Sjálfstæðisflokksins hafi verið virkjuð til þess að aðstoða Guðrúnu Karls við að tryggja sér biskupsembættið. Meðal annars með því að sinna úthringingum í þá rúmlega 2.000 einstaklinga sem voru á kjörskrá. Þá greindi Vísir frá því að þekktir samstarfsmenn Guðlaugs Þórs Þórðarssonar, umhverfis-, orku- og loftslagsráðherra, hafi haft aðkomu að framboði Guðrúnu Karls. Hafa þeir einnig verið bendlaðir við forsetaframboð Baldurs Þórhallssonar.
Guðmundur Karl staðfestir að hann hafi heyrt af svipuðum orðróm. Hins vegar segist hann ekki vera fær um að skera úr um það hvort slík afskipti geti talist eðlileg.
„Ég hef sagt með það, að það sem ekki er bannað er leyfilegt. Það voru engar reglur lagðar upp með hvað mætti gera, en svo má alltaf spyrja sig að því hvort það passi í svona kosningabaráttu. Það ekki mitt að dæma um það. En jú, ég hef alveg heyrt þetta.“
Í samtali tekur Guðmundur Karl fram að hann hafi sjálfur fengið til liðs við sig stóran hóp af fólki til þess að sinna úthringingum og styðja við framboð hans.
„En ég setti það sem skilyrði að ég vildi að það fólk sem væri að hringja þekkti mig persónulega og það tókst. Ég held þetta hafi verið 90 manns sem tóku þátt í úthringingum fyrir mig. Þannig þetta hefur verið mjög eflandi og gott fyrir mig að taka þátt í þessu.“
Athugasemdir (1)
Allt af létta
„Konur hafa veigrað sér við að koma inn á senuna“
Ruglað saman við Höllu T. og drakk frítt allt kvöldið
„Ég er alveg með sómatilfinningu“
„Konukot er til og ég þarf ekki að láta bjóða mér hvað sem er“
„Mjög skrítið að sjá andlitið á sér alls staðar“
Úthringingar eiga að tilheyra fortíðinni. Það á ekki að vera heimilt að hafa áhrif á kjósendur með að dextra þá á kjörstað. Kosningin á að vera algjörlega leynileg.