Stýrivextir Seðlabanka Íslands munu halda áfram að vera í 9,25 prósentum. Rétt í þessu tilkynnti peningastefnunefnd Seðlabankans um ákvörðun sína um að halda vöxtum bankans óbreyttum. Stýrivextir hafa ekki verið hærri síðan árið 2009.

Stýrivextir Seðlabanka Íslands voru hækkaðir í 9,25 prósent í ágúst í fyrra. Með ákvörðun peningastefnunefndar í morgun liggur fyrir að stýrivextir munu haldast í þeim hæðum í heilt ár, enda næsti vaxtaákvörðunardagur ekki fyrr en 21. ágúst næstkomandi. 

Í tilkynningunni kemur fram að ýmislegt bendi til þess að verðbólga muni þróast í átt að markmiðum bankans, en í dag mælist hún sex prósent.

Hægt hefur á vexti innlendrar eftirspurnar og horfur eru á að hagvöxtur dragist saman á þessu ári. Í tilkynningu bankans er þó tekið fram að spenna í þjóðarbúskapnum sé meiri en áður var talið.

Hins vegar segir í tilkynningunni að enn sé óljóst um áhrif nýgerðra kjarasamninga og boðaðra aðgerða í ríkisfjármálum.„Þótt hægt hafi á vinnumarkaði er spenna enn til staðar sem gæti ýtt undir launaskrið með tilheyrandi áhrifum á verðbólgu.“

Vonbrigði fyrir suma en viðbúið hjá öðrum

Flestir greiningaraðilar voru ekki vongóðir um vaxtalækkun, og spáðu því að vextirnir héldust áfram óbreyttir. Sú breyting hefur orðið á peningastefnunefndinni frá síðasta vaxtaákvörðunarfundi að eina „dúfan“ í henni, en það heiti er notað yfir þá sem vilja beita mildari meðölum til að takast á við efnahagslegar aðstæður, er nú horfinn til annarra starfa. Það var Gunnar Jakobsson, einn varaseðlabankastjóra bankans, en hann hefur talað reglulega fyrir því að að lækka vexti síðustu mánuði. Í hans stað hefur tímabundið sest Arnór Sighvatsson, fyrrverandi aðalhagfræðingur og varaseðlabankastjóri í Seðlabankanum.

Tveir helstu ráðamenn þjóðarinnar, Bjarni Benediktsson forsætisráðherra og Sigurður Ingi Jóhannsson, fjármála- og efnahagsráðherra, tjáðu sig báðir um mögulegar vaxtabreytingar í gær. Bjarni sagði við Vísi að hann vonaðist til þess að Seðlabankinn myndi lækka vexti á morgun og að hann teldi að aðstæður væru til þess. Sigurður Ingi sagði við RÚV að aðstæður í efnahagslífinu ættu að gefa svigrúm til að lækka vexti.