Framboð Katrínar Jakobsdóttur, fyrrverandi forsætisráðherra og formanns Vinstri grænna, gerir baráttuna um Bessastaði pólitíska að mati Jóns Gnarr forsetaframbjóðanda. Í þjóðmálaþættinum Pressu á föstudag þar sem frambjóðendurnir fjórir sem mælst hafa með mest fylgi í könnunum mættust í fyrsta sinn var Jón meðal annars spurður út í gagnrýni hans á Katrínu. Jón sagði framboð hennar „steikt og absúrd“ í viðtali í hlaðvarpinu Ein pæling og í viðtali við Heimildina fyrr í þessum mánuði sagði hann framboð Katrínar lýðræðislega umhugsunarvert en kannski líka „algjörlega brilljant“. 

„Ég var bara spurður beint. Hvað finnst þér um það að hún er að bjóða sig fram? Ég sagði mér finnst það skrýtið, mér fannst það skrýtið og mér finnst það smá skrýtið. Ég bara svaraði því einlægt og heiðarlega,“ sagði Jón.  

Með framboði Katrínar var kosningabaráttan mun pólitískari að mati Jóns. „Þetta er orðið svo pólitískt. Fyrst býður Baldur sig fram og hann er prófessor í stjórnmálafræði og hann er mjög pólitískur í sinni tilkynningu. Það eru alls konar pólitískar áherslur sem hann er að kynna þarna. Ég bara, já ókei. Síðan, ég meina, Katrín er bara einn okkar virtasti atvinnupólitíkus. Þegar hún tilkynnir framboð þá átta ég mig á því að þetta er orðið töluvert pólitískara mál heldur en ég hafði…“

 „Það er enginn að neyða þig til að vera hérna“

Helgi Seljan, annar þáttastjórnandi Pressu, greip þá inn í og spurði Jón hvort hann væri ekki í sama flokki og Baldur Þórhallsson var varaþingmaður fyrir á sínum tíma? Jón sagði að það væri langt síðan hann hefði haft afskipti af pólitík. Helgi spurði hvort hann væri ekki enn í Samfylkingunni, en Jón gekk í Samfylkinguna fyrir Alþingiskosningarnar 2017 en tók ekki sæti á lista flokksins.   

Þá var komið að Jóni að grípa fram í. „Abbabbabba. Hérna, sko, síðan erum við hérna, þið eruð með mjög pólitískar og beinskeyttar spurningar. Ekkert talað hér um heyskap eða sjómennsku.“

Helgi benti þá að það hefði verið til umræðu fyrr í þættinum og spurði svo:  „Eigum við að tala um eitthvað annað?“ Þá hló Jón. „Það er enginn að neyða þig til að vera hérna,“ sagði Helgi. 

„Nei, en þið voruð að spyrja mig um gagnrýni mína á Katrínu. Gagnrýni mín á Katrínu var í rauninni hugmyndafræðileg, hún er ekki persónuleg gagnvart henni. Mér líkar mjög vel við Katrínu. Með komu hennar inn í þessa kosningabaráttu verður þetta miklu miklu pólitískara,“ svaraði Jón.  

„En þú lítur ekki á sjálfan þig sem pólitíkus?“ spurði Aðalsteinn Kjartansson, annar þáttastjórnanda. 

„Ég lít ekki á mig sem pólitíkus. Ég starfa ekki sem pólitíkus, ég er sjálfstætt starfandi listamaður á Íslandi,“ sagði Jón.

„Þú ert ekki hljómsveit, þú ert fjöllistamaður,“ sagði Helgi.

Hér má horfa á Pressu í heild sinni þar sem forsetaframbjóðendurnir fjórir mættust. Fyrri helmingur þáttarins er aðgengilegur öllum en þátturinn í heild sinni er aðgengilegur áskrifendum.