7. október kl. 14.00 hélt Katrín Jakobsdóttir til Bessastaða til að biðjast lausnar sem forsætisráðherra. Kl. 11.52 hafði RÚV.is opnað fréttavakt undir rauðum borða: „Velkomin á vaktina“. Fimm mínútum seinna birtist þar viðtal við dósent í lögfræði sem lýsti hvað væri í vændum. Nokkrum fréttum seinna: „Styttist í fundinn“. Kl. 14.02: „Fundurinn hafinn“. Kl. 14.27: „Hífandi rok á Bessastöðum en Katrínu líður vel“. Kl. 14.28: Mynd af nafni Katrínar í gestabók á Bessastöðum. Á fimm tíma fréttavakt birtust 18 fréttir sem uppfylltu allar spádóm dósentsins í fyrstu frétt dagsins. 

Í bókinni The Image frá árinu 1961 fjallar Daniel Boorstin um svokallaða gervi-viðburði. Gervi-viðburðir eru ekki ófyrirsjáanlegir heldur skipulagðir: ekki jarðskjálfti heldur blaðamannafundur. Gervi-viðburðir eru sviðsettir svo hægt sé að flytja af þeim fréttir. Þeir taka ekki endilega af vafa heldur eru margræðir – kalla á skýringar, flytja okkur óljósar fréttir. Þannig getur einn gervi-viðburður kallað á annan. Þeir eru handhægir. Það er þægilegt að mynda þá. Fréttastofur nærast á þeim. Þær hætta að leita uppi fréttir og byrja að búa þær til.

Stanslausar fréttavaktir dynja á almenningi. Rauður borði á forsíðu RÚV gefur til kynna að stórtíðindi séu í vændum. Ekki eldgos, ekki rauð viðvörun heldur fundur. Lesendur eru hvattir til að endurhlaða síðuna til að nýjustu fréttir birtist jafnt og þétt. „Er stórra tíðinda að vænta í dag?“ spurði fréttamaður RÚV í fréttavakt sem þá hafði staðið í klukkustund. „Þetta er fallegur dagur,“ svaraði forsætisráðherra. Hvað má lesa í svarið? Það gæti kallað á aðra fréttavakt.

3. nóvember 2022 fyrirskipaði lögreglan að ljóskösturum yrði beint að myndavélum fréttastofu RÚV svo ekki yrði hægt að mynda hælisleitendur sem leiddir voru upp í flugvél. Viku fyrr var sama fréttastofa með beina útsendingu í kvöldfréttum frá útgáfuhófi forsætisráðherra. Hún hafði gefið út glæpasögu.

Hver stóri glæpurinn er í þeirri sögu sem hér hefur verið rakin skal ósagt látið. En á meðan okkur er talin trú um að ákvarðanir stjórnmálamanna séu náttúruhamfarir erum við höfð að algjörum fíflum.