Búrfellslundur innan áhrifasvæðis jökulhlaupa

Vind­orku­verið Búr­fellslundur, sem Lands­virkjun áformar austan Sult­ar­tanga­virkj­unar á Þjórsár- og Tungna­ár­svæð­inu, er innan mögu­legra áhrifa­svæða jök­ul­hlaupa vegna eldsum­brota undir Bárð­ar­bungu, Köldu­kvísl­ar­jökli og Sylgju­jökli.

Á þetta bendir Veð­ur­stofa Íslands í umsögn um til­lögu að deiliskipu­lagi hins fyr­ir­hug­aða virkj­un­ar­svæðis. Stofn­unin seg­ist hafa unnið  straum­fræði­lega lík­ana­reikn­inga fyrir nokkrar mögu­legar jök­ul­hlaupa­sviðs­myndir. „Samkvæmt nið­ur­stöðum reikn­ing­anna er mögu­leiki á að flóð­var í Sult­ar­tanga­stíflu, eða jafn­vel stíflan sjálf bresti í verstu sviðs­myndum,“ segir í umsögn­inni. Áætlað upp­bygg­ing­ar­svæði geti því farið á kaf „í djúpt og straum­þungt vatn með miklum tjón­mætti“. 

Möguleg jök­ul­hlaup eru áætluð mun stærri en svo að afmark­aðir flóð­far­vegir yfir­falls úr Sult­ar­tanga­lóni beri þau. 

Veð­ur­stofan gerir sér grein fyrir því að virkjun vatns­orku í jök­ulám er í eðli sínu við­kvæm fyrir jök­ul­hlaupum en bendir engu að síður á að áætluð stað­setn­ing vind­orku­vers á mögu­legu áhrifa­svæði jök­ul­hlaupa fjölgi „orku­fjöreggjum þjóð­ar­innar sem útsett eru fyrir sömu hættu“. Svo segir í umsögn stofn­un­ar­innar: „Velta má fyrir sér hvort að minnka megi sam­fé­lags­lega áhættu í orku­málum með því að sem fæstum orku­innviðum stafi ógn af hverjum einum til­teknum nátt­úru­vá­r­at­burði.“

Sveit­ar­fé­lagið Rangár­þing ytra, sem aug­lýsti deiliskipu­lagið, fékk verk­fræði­stof­una Eflu til að svara fram­komnum umsögnum. Efla leit­aði aftur svara hjá Lands­virkjun sem segir marga flóða­út­reikn­inga hafa verið gerða á fram­kvæmda­svæði Búr­fellslundar. Hönnun verk­efn­is­ins taki mið af því að vind­myll­urnar geti lent í straum­vatni og eru hönn­un­ar­for­sendur sagðar sér­hann­aðar með það í huga þar sem bæði er litið til veð­ur­fars­legra flóða sem og jök­ul­hlaupa.

Þó sé ekki litið til þeirra stærstu sem talin eru mögu­leg enda að mati Lands­virkj­unar óraun­hæft að hanna mann­virki sem stand­ast flóð þar sem jörðin sjálf geti tekið umtals­verðum breyt­ingum.

Þá taki  hönn­un­ar­for­sendur vind­myll­anna og til­heyr­andi mann­virkja til­lit til mögu­leika á stífl­urofi og flóð­vars­rofi.