„Ég held að kærur séu í sjálfu sér ekkert frábær mælikvarði á það hvort að kynferðisbrot séu færri eða fleiri. Það er lítið brot sem kærir,“ segir Drífa Snædal, talsmaður Stígamóta. Í dag kom út ný skýrsla frá Ríkislögreglustjóra þar sem kemur fram að ekki hafa komið jafn fáar tilkynningar um kynferðisbrot til lögreglu síðan árið 2017.
Í skýrslunni kemur fram að tilkynningar um nauðganir og kynferðisofbeldi gegn börnum fækkar umtalsvert. Um 45% brotaþola eru börn.
Í tilkynningu Ríkislögreglustjóra segir að „þegar litið er til kynferðisbrota sem tilkynnt eru lögreglu árið 2023 má sjá að tilkynnt brot voru 521 talsins á árinu 2023 eða 15% færri en að meðaltali samanborið við síðustu þrjú ár þar á undan.“
Finna ekki fyrir fækkun á komum til Stígamóta
Drífa segir að þau hjá Stígamót finni ekki fyrir neinni fækkun á fólki sem leitar til þeirra vegna kynferðisbrota. „Það sem ákveður það hvort að fólk kærir kynferðisbrot er traust gagnvart lögreglunni, traust á kerfinu, stuðningur til þess að kæra og svo framvegis. Þannig það eru önnur öfl í gangi sem gefa mynd af því hvort að kærur séu fleiri en færri heldur en tíðni kynferðisbrota.“
Tilkynningar um nauðganir til lögreglunnar á síðasta ári voru 184. Þar af voru 121 sem áttu sér stað á síðasta ári. „Tilkynntum nauðgunum fækkaði um 13% samanborið við meðaltal síðustu þriggja ára þar á undan“ kemur fram í tilkynningunni.
„Við höfum verið að sjá það gegnum gangandi hér hjá Stígamótum í gegnum tíðina að það er rétt rúmlega 10% prósent sem koma til okkar sem að hafa kært. Þetta er nú ekki hátt hlutfall,“ segir Drífa.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir