Ef hleypt tekst að hleypa vatni á heita­vatns­lögn frá Svarts­engi til byggð­ar­laga á Reykja­nesskaga í kvöld, líkt og stefnt er að, yrði hiti ekki far­inn að kom­ast á hús fyrr en á sunnu­dag og jafn­vel ekki fyrr en seint á sunnu­dags­kvöld.

Í til­kynn­ingu frá lög­regl­unni á Suð­ur­nesjum er farið í nokkrum orðum yfir stöð­una eins og hún er núna og hvað hefur áunn­ist í við­gerð­ar­mál­unum í nótt. 13 þús­und heim­ili eru án vatns, hús sem í búa tæp­lega 30 þús­und manns.

 „Verið er að vinna í að tengja lögn­ina sem skemmd­ist í gær og gengur sú vinna vel,“ er full­yrt í til­kynn­ing­unni.  „Það má búast við að þeirri vinnu ljúki síðar í dag og komi ekk­ert óvænt upp þá verður byrjað að hleypa vatni á lögn­ina í kvöld.“ 

Vatni yrði hins vegar hleypt  „mjög hægt á til að byrja með” til að koma í veg fyrir að lögnin rifni. Búast megi svo við því að hún sé löskuð á ein­hverjum stöðum. 

 „Miðað við þetta þá má búast við því að hiti fari að kom­ast á hús á sunnu­dag og jafn­vel seint á sunnu­dags­kvöldið.“ 

Í til­kynn­ing­unni er íbúum Suð­ur­nesja hrósað fyrir að stilla álagi á kerfin í hóf. Eru þeir enn­fremur hvattir til að halda því áfram.

Almanna­varnir sendu reyndar frá sér til­kynn­ingu skömmu eftir að lög­reglan gerði það og sagði að sam­kvæmt upp­lýs­ingum frá HS Orku yrði seinkun á því að hleypa heitu vatni á nýju hjá­veitu­lögn­ina við Njarð­vík­ur­lögn­ina sem hraun flæddi yfir í gær. Vinnan hafi reyndar gengið vel, segja almanna­varnir, en engu að síður hafi orðið tafir. Nú sé steftnt að því að hægt verði að hleypa vatni á lögn­ina á mið­nætti í kvöld, föstu­dag.

 „Til upp­lýs­inga getur tekið allt að tvo sól­ar­hringa til að ná fullum þrýst­ingi á lögn­ina og því þarf fólk að fara spar­lega með vatnið áfram eftir að búið er að hleypa heitu vatni aftur á í kvöld,“ segir i til­kynn­ingu almanna­varna.

Orku­stofnun, HS Veitur og HS Orka hafa frá því í nóv­em­ber hvatt stjórn­völd til að hefja und­ir­bún­ing þess að svona gæti farið. Að eldsum­brotin á Reykja­nesi skaði inn­viði á borð við einmitt þessa heita­vatns­lögn. Var m.a. mælst til þess að keyptir væru sér­stakir hita­blás­arar fyrir heim­ili á svæð­inu.

Ekki hafði verið brugð­ist við þessum ábend­ingum nema að litlu leyti er þessi sviðs­mynd, ein sú versta sem hugs­ast gat, raun­gerð­ist í gær. Enda varð raunin sú að íbúar á svæð­inu streymdu í versl­anir til að kaupa sér sjálfir ofna, jafn­vel gasofna, til að halda hita á húsum sínum. 

Ekki mikið meira en einn öflugur hárblásari

Raf­orku­kerfið þolir hins vegar ekki meiri­háttar álag vegna raf­magns­kynd­ingar. Víðir Reyn­is­son, sviðs­stjóri hjá almanna­vörnum, sagði t.d. í fréttum í gær:  „En við verðum að muna það að sú orka sem við getum notað á hverju heim­ili, er ekk­ert mikið meiri en í einum öfl­ugum hár­blás­ara. Það er ekki hægt að setja upp fjölda blás­ara á hverju heim­ili til að halda uppi miklum hita.“

Allir að gera sitt besta

 „Við tæklum þetta í sam­ein­ingu,” segir í til­kynn­ingu lög­regl­unnar á Suð­ur­nesjum til íbúa. „Og vonum að hiti kom­ist á hjá okkur sem fyrst, en það er ljóst að allir eru að gera sitt besta, hvort sem það eru iðn­að­ar­menn að störfum á ham­fara­svæð­inu eða íbúar Suð­ur­nesja.“