Arion banki hagnaðist um 25,7 milljarða króna á árinu 2023. Það er mjög svipaður hagnaður og hjá bankanum árið áður, þegar hagnaðurinn nam tæpum 26 milljörðum króna. Þó verður að taka fram að tekjur vegna aflagðrar starfsemi voru 6,5 milljarðar króna árið 2022 en einungis fjórar milljónir króna í fyrra. Er þar um að ræða Valitor, sem Rapyd keypti af Arion banka á árinu 2022. Hreinar rekstrartekjur Arion banka af undirliggjandi rekstri jukust því umtalsvert á síðasta ári um 8,9 milljarða króna á milli ára, aðallega vegna þess að hreinar fjármunatekjur voru jákvæðar upp á 1,4 milljarða króna 2023 en höfðu verið neikvæðar um 3,3 milljarða króna árið 2022. 

Arðsemi eigin fjár bankans var 13,6 prósent, sem var aðeins minni en arðsemin var 2022, og kostnaðarhlutfallið var 44,7 prósent, mjög sambærilegt við árið áður. Bæði hlutföllin eru umfram fjárhagsleg markmið bankans. 

Á grundvelli þessarar rekstrarniðurstöðu leggur stjórn bankans til að 13 milljarðar króna verði greiddir til hluthafa auk þess sem til stendur að halda áfram að kaupa eigin bréf af hluthöfum. Hann skilaði 15,7 milljörðum króna til hluthafa sinna með arðgreiðslum og kaupum á eigin bréfum á árinu 2023. Íslenskir lífeyrissjóðir eru saman stærstu eigendur Arion banka. Þrír stærstu sjóðirnir: Gildi, Lífeyrissjóður starfsmanna ríkisinsog Lífeyrissjóður verzlunarmanna eiga allir á bilinu níu til tæplega tíu prósent hlut í bankanum. Stærsti einkafjárfestirinn er fjárfestingafélagið Stoðir með 5,38 prósent hlut.

Þetta kemur fram í ársreikningi Arion banka sem birtur var í dag. 

Vaxtamunurinn stendur í stað milli ára

Hreinar vaxtatekjur eru áfram sem áður stærsti þátturinn í rekstrartekjum Arion banka, líkt og annarra banka, eða 70 prósent þeirra. Alls námu þær 44,7 milljörðum króna í fyrra sem var 4,5 milljörðum króna meira en á árinu 2022. Vaxtamunur var 3,1 prósent sem er sami vaxtamunur og var árið 2022. Hreinar þóknanatekjur stóðu í stað og voru um 16,4 milljarðar króna. 

Efnahagsreikningur bankans stækkaði um 4,1 prósent frá árslokum 2022 og fram að síðustu áramótum þegar eignir Arion banka metnar á 1.526 milljarða króna. Lán til viðskiptavina jukust um 6,3 prósent á árinu. Hækkun á lánum til fyrirtækja var 8,2 prósent og 4,6 prósent á lánum til einstaklinga, einkum íbúðalán. 

Innlán frá viðskiptavinum jukust um 4,9 prósent á árinu 2023 og eigið fé var 198,8 milljarðar króna um liðin áramót. Eiginfjárhlutfall var 24,1 prósent.

Bankastjórinn með nánast sömu laun og 2022

Benedikt Gíslason, bankastjóri Arion banka, var með 86,7 milljónir króna í laun, árangurstengdar greiðslur og mótframlag í lífeyrissjóð á árinu 2023. Það gera rúmlega 7,2 milljónir króna að meðaltali á mánuði. Heildarlaun hans voru nánast þau sömu og árið áður, þegar bankinn greiddi honum 87,2 milljónir króna.

Meira launaskrið var á meðal stjórnarmanna í bankanum. Brynjólfur Bjarnason, stjórnarformaður Arion banka, fékk alls 26,5 milljónir króna föst laun, önnur laun og framlag í lífeyrissjóð á síðasta ári, eða 2,2 milljónir króna á mánuði að meðaltali. Það er 13,2 prósent fleiri krónur en Brynjólfur fékk í laun ári áður. Stjórnarmaðurinn Paul Horner fékk 25,6 milljónir króna í heildargreiðslur, rúmlega 2,1 milljón króna á mánuði, en var með 22,5 milljónir króna árið áður. Aðrir stjórnarmenn hækkuðu líka, en minna en þeir tveir í krónum talið. 

Stjórnarmenn í bankanum fengu greitt fyrir að mæta á alls 13 stjórnarfundi sem haldnir voru á árinu auk þess sem þeir fá viðbótargreiðslur fyrir setu í nefndum stjórnar. Á árinu haldnir sjö fundir í lánanefnd, fimm fundir í endurskoðunarnefnd, níu fundir í áhættunefnd, fimm fundir í starfskjaranefnd og fjórir í tækninefnd. Auk þess fá stjórnarmenn sem búsettir eru erlendis 350.000 krónur greiddar vegna hvers stjórnarfundar sem þeir sækja í eigin persónu.