Indó sparisjóður stefnir á að hefja útlánastarfsemi til einstaklinga snemma á nýju ári, að sögn Hauks Skúlasonar, framkvæmdastjóra indó. Í samtali við Heimildina segir Haukar þetta fyrsta starfsár hafa gengið vonum framar, „við höfðum svona ákveðnar væntingar og vonir, en við erum komin langt fram úr því sem við vonuðumst eftir.“
Í nýlegri fréttatilkynningu bankans er greint frá því að rúmlega 45.000 manns hafi stofnað reikning hjá indó á árinu og að samanlagt hafi viðskiptavinir bankans sparað 347 milljónir krónar með því að nota kort frá indó. Bankinn rukkar hvorki færslugjöld eða gjaldeyrisálag, sem bankinn nefnir „óþarfa bullgjöld.“
Spurður út í hvað sé framundan á nýju ári hjá indó segir Haukur að fyrri hluti ársins muni fara út í að útfæra útlánaþjónustu bankans. Hann leggur áherslu á að fyrirtækið vandi sig sem allra mest við að kynna til leiks nýja þjónustu fyrir viðskiptavini sína.
„Síðan erum við með allskonar skemmtilega hluti í pípunum. Það eru hlutir eins og sameiginlegir reikningar. Svo ætlum við að opna á aðgang fyrir einstaklinga undir 18 ára líka. Við ætlum að gera það svona með hætti sem hefur ekki sést áður á Íslandi, sem gerir það soldið skemmtilegt,“ segir Haukur.
„Við erum alveg skýrt plan með það hvað við ætlum að gera næstu misserin. Áskorunin er að vanda sig í hverju skrefi ef við reynum að gera of mikið of hratt getur það skapað vandamál.“
Mörg verkefni eru því fram undan og sjóðurinn áætlar að færa viðskiptavinum sínum fleiri þjónustumöguleika á næstu misserum. Þá bendir hann einnig á að fyrirtækið horfi gjarnan til væntinga og vilja viðskiptavina sinni við forgangsröðun og þróun á nýjum vörum. Til mynda sé sjóðurinn með hugmyndabanka á vefsíðu sinni.
Indó tók formlega til starfa 30. janúar á þessu ári og er fyrsti íslenski sparisjóðurinn sem hefur verið stofnaður frá 1991. Fyrirtækið ætlar sér að breyta íslensku bankakerfi og fara ótroðnar slóðir. Meðal annars með því að sleppa því að rukka óþarfa gjöld. Þá leggur sparisjóðurinn mikið upp úr gagnsæi og trausti milli sjóðsins og viðskiptavina hans.
Sjóðurinn stækkar og tekjustraumum fjölgar
Upphaflega voru tekjustraumar indó af tvennu tagi. Annars vegar af ávöxtun af innlánum sem lögð voru inn á viðskiptareikningi hjá Seðlabanka Íslands. Hinn tekjustraumurinn var síðan af færslugjöldum sem söluaðili greiðir þegar tekið er við greiðslu frá Visa-korti indó. Á árinu hefur sjóðurinn stækkað og kjölfarið fært sig aðra eignarhluta, sem hann hefur tekjur af.
„Til dæmis erum núna með ríkisvíxla og ríkisverðbréf sem við setjum fjármunina í. Svo náttúrulega þegar við förum að lána út til okkar viðskiptavina, þá fer hluti innlána viðskiptavina í það að lána öðrum viðskiptavinum,“ segir Haukur.
Athugasemdir