„Und­ir­bún­ingur gengur vel, við erum bara á fullu,“ segir Anna H. Pét­urs­dóttir, sem hefur verið for­maður mæðra­styrks­nefndar Reykja­víkur frá 2015, aðspurð hvernig und­ir­bún­ingur fyrir jólin gangi. 

Mæðra­styrks­nefnd Reykja­víkur hefur verið sjálf­stætt starf­andi síðan árið 1939. Á bak við nefnd­ina standa sex kven­fé­lög: Hvíta­bandið, Hvöt, Félag Sjálf­stæð­iskvenna, Félag háskóla­kvenna, Framsókn, Alþýðu­flokkur og Thor­vald­sens­fé­lagið. 

Meðal þeirrar aðstoðar sem stendur til boða hjá mæðra­styrks­nefnd eru mat­ar­út­hlut­anir. Sú aðstoð stendur til boða allt árið en fjöldi þeirra sem nýta sér hana eykst fyrir hver jól. Eftir að mat­ar­út­hlut­un­inni er lokið úthlutar mæðra­styrks­nefnd jóla­gjöfum.

Þar sem umsókn­ar­frestur var nýlið­inn þegar blaða­kona Heim­ild­ar­innar náði tali af Önnu gat hún ekki sagt nákvæm­lega til um hve margir höfðu sótt um aðstoð. Anna gerir hins vegar ráð fyrir að fjöld­inn verði svip­aður og í fyrra. „Við eigum von á svona 1.500 heim­ilum. Í kringum það.“

400 heimili alla jafna

Fjöldi þeirra sem sækja um hefur staðið í stað síð­ustu ár. Anna segir 1.500 heim­ili engu að síður mik­inn fjölda og er alltaf mest aðsókn fyrir jólin.

Eftir efna­hags­hrunið 2008 sóttu um 2.000 heim­ili sér aðstoð. „Það hefur ekki verið mikil aukn­ing. Við höfum farið upp í 2.000 heim­ili, til dæmis í hrun­inu, þá fór þetta alveg upp í 2.000 heim­ili. Svo var þetta líka mikið í Covid af því að það voru margir sem höfðu bara ekki efni á jól­unum þá.“

Anna segir mik­inn mun á því að vinna fyrir mæðra­styrks­nefnd fyrir jólin og á öðrum tímum árs­ins. „Já, það er mjög mik­ill munur. Það eru svo miklu fleiri sem koma, á þessum tveimur dögum sem við erum með opið erum við að fá 1.500 heim­ili en í venju­legri viku erum við með 400 heim­ili.“

Hefur hóp­ur­inn sem sækir sér aðstoð frá mæðra­styrks­nefnd eitt­hvað breyst?

„Nei, hann hefur nú lítið breyst, eig­in­lega ekk­ert,“ svarar Anna. Hún segir öryrkja og elli­líf­eyr­is­þega stóran hluta af hópnum en einnig fólk sem er að koma úr með­ferðum og búa á áfanga­heim­ilum eins og Drauma­setr­inu. „Þessu fólki erum við að hjálpa.“

Að eigin sögn hefur Anna alltaf haft þörf fyrir að hjálpa fólki. Hún vinnur fullt starf í sjálf­boða­liða­vinnu og seg­ist hafa gaman af starf­inu sínu. „Meira að segja þegar ég var sjö ára þá sagði ég við mömmu þegar ég heyrði talað um mæðra­styrks­nefnd: Þetta ætla ég að gera þegar ég verð stór. Og ég stóð við það.“

Anna H. Pét­urs­dóttirSagði við móður sína aðeins sjö ára gömul að hún ætl­aði að starfa fyrir mæðra­styrks­nefnd.

Mynd: Heiða Helga­dóttir

Árið 2012 stofn­aði mæðra­styrks­nefnd mennt­un­ar­sjóð og hefur Anna tekið þátt í honum síðan þá. Sjóðnum er ætlað „að styrkja tekju­lágar konur og/eða mæður til mennt­unar svo að þær eigi betri mögu­leika á góðu fram­tíð­ar­starfi“.

Nú, rúm­lega 10 árum síðar, hafa nokkur hund­ruð konur verið styrktar til náms. „Við erum búin að hjálpa meira en 500 konum að mennta sig. Þetta skólaár erum við með 60 konur. Við erum að reyna að fá kon­urnar til að mennta sig svo þær þurfi ekki að leita til okkar. Geti farið að vinna og sinnt sér og börn­unum sínum,“ útskýrir Anna en hægt er að styrkja bæði mæðra­styrks­nefnd og mennt­un­ar­sjóð­inn á Mæður.is.