„Mér barst bréf úr húsi valds­ins,“ segir rit­höf­und­ur­inn Þórdís Helga­dóttir á Facebook þar sem hún greinir frá því að henni hafi verið boðið að lesa upp úr nýút­kominni skáld­sögu sinni, Armeló, fyrir starfs­fólk for­sæt­is­ráðu­neyt­is­ins.

Þórdís deilir þar svari sínu til ráðu­neyt­is­ins þar sem hún afþakkar boðið og biður um að komið sé á fram­færi ein­lægri ósk hennar um að „a) að veita öllum Palest­ínu­mönnum hér á landi alþjóð­lega vernd af mann­úð­ar­á­stæðum, b) greiða fyrir taf­ar­lausri fjöl­skyldu­sam­ein­ingu, c) for­dæma þjóð­ar­morðið fullum fetum á alþjóða­vett­vangi og d) slíta stjórn­mála­sam­bandi við Ísra­els­ríki.“

Þórdís bæt­ist hér í hóp þeirra sem hafa kallað eftir afdrátt­ar­lausri afstöðu íslenskra stjórn­valda þegar kemur að stríð­inu fyrir botni Mið­jarð­ar­hafs. Í byrjun nóv­em­ber var greint frá því að mik­ill meiri­hluti Ís­lend­inga væri ósátt­ur við að Ís­land hafi set­ið hjá við at­kvæða­greiðslu á þingi Sam­ein­uðu þjóð­anna um vopna­hlé á Gaza.  Þá hvöttu um sjö­tíu íslenskir rit­höf­undar til snið­göngu á bók­mennta­há­tíð­inni Iceland Noir, sem haldin var í lok síð­asta mán­aðar, vegna þátt­töku Hillary Clinton sem hefur talað gegn vopna­hléi á Gaza.

Á Facebook síðu sinni deilir Þórdís bréfi frá starfs­manni for­sæt­is­ráðu­neyt­is­ins þar sem kemur fram að áhugi sé innan ráðu­neyt­is­ins að fá hana á starfs­manna­fund þann 11. des­em­ber til að kynna og lesa úr bók hennar, Armeló.

Hún birtir þar einnig svar sitt til ráðu­neyt­is­ins.

„Ég myndi svo gjarnan vilja koma og lesa upp fyrir starfs­fólk for­sæt­is­ráðu­neyt­is­ins, sem er upp til hópa eflaust mikið menn­ingar- og bóka­fólk sem gaman væri að fá að hitta. Því miður verð ég samt að afþakka,“ skrifar Þordís.

Finnst hún hrópa út í tómið

„Þetta eru und­ar­legir tímar þar sem hver dagur er nýtt áfall og maður fylgist með því þar sem verið er að myrða börn í þús­unda­vís – ég næ varla utan um það að ég sé einu sinni að skrifa þessi orð. Eins og svo mörg önnur upp­lifi ég gríð­ar­legan van­mátt, okkur finnst við vera að hrópa út í tómið hvern ein­asta dag, þar sem við biðlum til stjórn­valda að gera þó að minnsta kosti það litla sem í þeirra valdi stendur til að spyrna á móti bók­staf­legu þjóð­ar­morði.

Ég geri mér fulla grein fyrir því að margt af ykkar starfs­fólki er í sjálfu sér ekki í stöðu til að hafa áhrif. En innan ykkar veggja – í þessu húsi valds­ins – eru svo sann­ar­lega líka þau sem fara með ákvörð­un­ar­valdið fyrir hönd þjóð­ar­innar,“ skrifar Þórdís í svari sínu til for­sæt­is­ráðu­neyt­is­ins.

Þá tekur hún fram að það sé undir „okkur öllum“ að gera það sem mögu­legt er. „Ég er svo sem bara átaka­fæl­inn rit­höf­undur úti í bæ sem vill aug­lýsa eigin verk sem mest og best, og undir venju­legum kring­um­stæðum væri auð­vitað hægt að halda nota­lega bók­mennta­stund á aðvent­unni án þess að spyrja um póli­tíska afstöðu. En kring­um­stæð­urnar eru ekki venju­legar og ég veit yfir­höfuð ekki alveg hvernig við eigum að fara að því að njóta aðvent­unnar. Þess vegna mun ég líka birta afrit af þessu svari á sam­fé­lags­miðlum,“ skrifar hún og lýkur svar­inu á orð­unum „Með vin­semd og virð­ingu.“

Fjöldi fólks hefur brugð­ist við færslu Þórdísar, þar af hafa margir rit­höf­undar lýst yfir vel­þóknun sinni á henni. Þeirra á meðal eru Margrét Tryggva­dóttir, for­maður Rit­höf­unda­sam­bands­ins,  Kristín Helga Gunn­ars­dóttir, fyrr­ver­andi for­maður RSÍ, Bergþóra Snæ­björns­dóttir, Sunna Dís Más­dóttir og Guð­mundur Brynj­ólfs­son.