Ivan Vindheim, forstjóri norska laxeldisfyrirtækisins Mowi sem á meirihluta í Arctic Fish á Ísafirði, hefur ekki viljað svara því hvort laxalúsafaraldurinn sem kom upp hjá fyrirtækinu í Tálknafirði nú í haust hafi haft einhverjar afleiðingar fyrir einhvern eða einhverja af starfsmönnum Arctic Fish. Þetta segir Ivan Vindheim í viðtali við norska blaðið Dagens Næringsliv. „Ég vil ekki ræða slíka hluti við fjölmiðla. Allt sem lítur að einstaka starfsmönnum lítur ströngum trúnaði.“

Talsverður fréttaflutningur var um lúsasfaraldurinn í norskum fjölmiðlum eftir að Heimildin greindi frá honum í byrjun nóvember og birti myndir Veigu Grétarsdóttur af sárugum, deyjandi og dauðum eldislöxum í sjókví Arctic Fish í Tálknafirði í  nóvember. Sagt var frá því að meira en milljón eldislaxar hefðu orðið lúsinni að bráð. Ástæðan er sú að umfangs lúsarinnar var svo mikið að það var talið vera án hliðstæðu.  Sá fjölmiðill sem fjallaði einna mest um málið í Noregi var Dagens Næringsliv. 

Forstjóri Arctic Fish, Stein Ove Tveiten, segir í svari sínu við spurningum Heimildarinnar um þessi ummæli Ivan Vindheims og hvort einhver hafi sætt ábyrgð á lúsafaraldrinum að hann geti ekki tjáð sig um þetta. „Ég er ekki með nein komment um þetta,“ segir hann í svari í sms-skilaboðum. 

Afföll í október 1278 þúsund eldislaxar

Samkvæmt Mælaborði fiskeldis hjá Matvælastofnun voru affföll í sjókvíaeldi á Íslandi rúmlega 1278 þúsund eldislaxar í október.

Bara í Patreksfirði, sem einnig telur Tálknafjörð, voru afföllin í október 1027 þúsund fiskar. Þetta er vegna laxalúsarinnar.  Eins og Heimildin greindi frá þá voru tæplega 100 lýs á hverjum fiski hjá Arctic Fish í Tálknafirði byrjun október. 

Til samburðar við þessar tölur þá ganga um 83 þúsund villtir laxar upp í íslenskar ár á hverju ári. Bara afföllin í október eru því ríflega fimmtán sinnum hærri en allur sá fjöldi villtra laxa sem gengur upp í íslenskar ár á hverju sumri. 

Segir Arctic Fish og yfirvöld á Íslandi hafa sofið á verðinumIvan Vindheim segir að Arctic Fish á Ísafirði og yfirvöld á Íslandi hafi sofið á verðinum varðandi laxalúsina á Vestfjörðum.

Arctic Fish ekki komið nægilega langt

Í viðtali segir Ivan Vindheim að Arctic Fish sé einfaldlega ekki komið nægilega langt í sínum rekstri til að uppfylla kröfur Mowi, sem er stærsta laxeldisfyrirtæki í heimi. Mowi hefur átt meirihlutann, 51 prósent í Arctic Fish, síðan í janúar. „Við getum bara sagt það hreint út að þetta fyrirtæki er ekki enn búið að ná þeim standördum sem við hjá Mowi setjum. Slíkir atburðir eiga ekki að eiga sér stað. Það koma upp vandamál í tengslum við lús í öllum löndum þar sem við eigum og rekum sjókvíar og við höfum tekist á við þetta með góðum hætti á öllum öðrum stöðum. Þetta ætlum við líka að gera á Íslandi til að þetta gerist ekki aftur. Það er engin ástæða fyrir því að þetta þurfi að vera svona á Íslandi.“

Vindheim sagði að laxalús hefði ekki verið vandamál á Íslandi hingað til. „Lús hefur ekki verið vandamál á Íslandi í gegnum og ég held að bæði Arctic Fish og íslenskar stofnanir hafi sofið svolítið á verðinum. Við verðum reiðubúnir næst.“