Fylgi stjórnarflokkanna þriggja mælist nú samanlagt 34,4 prósent samkvæmt nýjustu könnun Maskínu. Það er 20 prósentustigum minna fylgi en þeir fengu saman í kosningunum í lok september 2021. 

Litlar breytingar eru á fylgi flokkanna þriggja: Sjálfstæðisflokks, Framsóknarflokks og Vinstri grænna, milli mánaða. Sjálfstæðisflokkurinn mælist þeirra stærstu með 17,9 prósent fylgi. Framsókn kemur þar á eftir með 10,4 prósent fylgi og Vinstri græn reka lestina með 6,1 prósent fylgi. 

Mynd: Maskína

Það gerir raunar að verkum að Vinstri græn, flokkur Katrínar Jakobsdóttur forsætisráðherra, eru sá flokkur sem á þingmenn á Alþingi í dag sem mælist með minnst fylgi. Vinstri græn eru því áttundi stærsti flokkur landsins sem stendur.

Fylgistap stjórnarflokkanna er nokkuð jafnt. Framsóknarflokkurinn er sá stjórnarflokkur sem hefur tapað mestu fylgi, eða um sjö prósentustigum frá síðustu kosningum. Sjálfstæðisflokkurinn og Vinstri græn koma hins vegar skammt undan, en þeir flokkar hafa báðir tapað 6,6 prósentustigum af fylgi á þeim rúmu tveimur árum sem liðið eru frá því að kosið var síðast. 

Samanlagt fylgi ríkisstjórnarflokkanna hefur nú mælst undir 40 prósent í öllum könnunum Maskínu síðar í febrúar á þessu ári. 

Öll andstaðan bætt við sig nema Flokkur fólksins

Samfylkingin hefur tekið langmest af því fylgi sem hefur færst á milli flokka það sem af er kjörtímabili. Flokkurinn mælist nú með 26 prósent fylgi og hefur mælst stærsti flokkur landsins í könnunum Maskínu allt þetta ár. Samfylkingin fékk 9,9 prósent atkvæða í síðustu kosningum sem þýðir að flokkur Kristrúnar Frostadóttur hefur bætt við sig rúmlega 16 prósentustigum frá því í september 2021. 

Sá stjórnarandstöðuflokkur fyrir utan Samfylkinguna sem hefur bætt næst mestu fylgi við sig er Miðflokkurinn. Hann mælist nú með þremur prósentustigum meira fylgi en hann fékk í síðustu kosningum en alls segjast 8,4 prósent landsmanna að þeir styðji flokkinn. Miðflokkurinn er þrátt fyrir það einungis sjötti stærsti flokkurinn á þingi, með um tveimur prósentustigum meira af fylgi en Flokkur fólksins, sem mælist með 6,4 prósent stuðning. Flokkur Ingu Sæland er raunar eini stjórnarandstöðuflokkurinn sem mælist með minna fylgi nú en hann fékk í síðustu kosningum. 

Viðreisn tekur fram úr Pírötum í nýjustu könnuninni og er mælist nú nánast með sama fylgi og Framsókn, eða 10,3 prósent. Það er tæplega tveimur prósentustigum meira en Viðreisn fékk í kosningunum í september 2021. Píratar eru svo að mælast með tíu prósent fylgi, en fengu 8,7 prósent þegar síðar var kosið. 

Einn flokkur utan þings mælist með fylgi. Það er Sósíalistaflokkur Íslands, en 4,4 prósent landsmanna segjast styðja hann. 

Óánægja með æðstu ráðamenn

Fyrr í dag birti annað könnunarfyrirtæki, Prósent, niðurstöðu könnunar sinnar á ánægju með störf þriggja af æðstu embættismönnum þjóðarinnar: Bjarna Benediktssonar utanríkisráðherra, Katrínar Jakobsdóttur forsætisráðherra og Ásgeirs Jónssonar seðlabankastjóra. Næstum átta af hverjum tíu landsmönnum sögðust óánægð með störf Bjarna, sem var áður fjármála- og efnahagsráðherra í meira og minna í áratug. Einungis 11,8 prósent sögðust ánægð með ráðherrastörf Bjarna.

Ásgeir Jónsson seðlabankastjóri kemur skammt undan í óvinsældum. Alls segjast næstum tveir af hverjum þremur, 64,5 prósent, vera óánægð með störf hans og 14 prósent lýsa yfir ánægju með þau.

Katrín Jakobsdóttir forsætisráðherra mælist minna óvinsæl en ofangreindir en er þó í þeirri stöðu að rúmlega helmingur aðspurðra, 54,2 prósent, sögðust óánægðir með störf hennar. Tæpur fjórðungur segist hins vegar vera ánægð með forsætisráðherra. 

Í könnun Prósents kom fram að fylgjendur Vinstri grænna og Sjálfstæðisflokksins eru ánægðari með störf Katrínar en fylgjendur annarra flokka. Þar segir enn fremur að fylgjendur Sjálfstæðisflokksins séu ánægðari með störf Bjarna Benediktssonar en fylgjendur annarra flokka auk þess sem þeir eru ánægðari með störf Ásgeirs Jónssonar en allir aðrir flokkar fyrir utan Vinstri græn. 

Þá kemur fram að konur eru marktækt ánægðari með störf Katrínar en karlar.