Konráð S. Guðjónsson, sem starfað hefur sem aðalhagfræðingur Arion banka síðastliðið hálft ár, hefur verið ráðinn aðstoðarmaður Þórdísar Kolbrúnar R. Gylfadóttur, fjármála- og efnahagsráðherra. Þar með er Þordís búin að ráða í báðar aðstoðarmannastöðurnar sem lög heimila henni að ráða í en Inga Hrefna Sveinbjarnardóttir fylgdi henni yfir í fjármála- og efnahagsráðuneytið úr utanríkisráðuneytinu þegar Þórdís skipti um ráðherrastól í síðasta mánuði.
Konráð hefur verið áberandi í umræðu um íslensk efnahagsmál á undanförnum árum. Hann var hagfræðingur og aðstoðarframkvæmdastjóri Viðskiptaráðs um fjögurra ára skeið og færði sig síðan yfir í starf aðalhagfræðings Stefnis, sjóðsstýringafyrirtækis Arion banka. Í ágúst í fyrra var hann svo ráðinn tímabundið í stöðu efnahagsráðgjafa Samtaka atvinnulífsins í aðdraganda kjarasamningagerðar og tók sæti í samninganefnd samtakanna.
Þriðja konan
Þórdís Kolbrún tók við embætti fjármála- og efnahagsráðherra 14. október síðastliðinn í kjölfar þess að Bjarni Benediktsson sagði af sér því embætti. Þau, formaður og varaformaður Sjálfstæðisflokksins, höfðu sætaskipti og Bjarni færði sig í utanríkisráðuneytið.
Hún er 27 einstaklingurinn sem gegnir stöðu fjármála- og efnahagsráðherra í lýðveldissögunni og þriðja konan til að gegna þessu eina valdamesta embætti landsins.
Oddný Harðardóttir varð fyrsta konan til að gegna embætti fjármálaráðherra þegar hún tók við því á gamlársdag 2011.
Oddný sat í embætti í níu mánuði og þá tók flokkssystir hennar Katrín Júlíusdóttir við. Hún sat í embættinu í tæpa átta mánuði. Því hafa konur verið fjármálaráðherrar á Íslandi í minna en 17 mánuði frá árinu 1944.
Athugasemdir