Tvær þingsályktunartillögur höfðu verið lagðar fram á Alþingi um átökin og ástandið fyrir botni Miðjarðarhafs. Píratar, Samfylking, Flokkur Fólksins og tvær þingkonur Vinstri grænna vildu að aðgerðir Ísraelshers í Palestínu yrðu fordæmdar og að kallað yrði eftir tafarlausu vopnahléi af mannúðarástæðum.
Tillaga Viðreisnar var samhljóða breytingartillögu Kanada á allsherjarþingi Sameinuðu þjóðanna.
Ísland sat eins og kunnugt er hjá í atkvæðagreiðslu við tillögu Jórdana á allsherjarþingi Sameinuðu þjóðanna í lok október eftir að þar fór fram neyðarumræða vegna stríðsins fyrir botni Miðjarðarhafs.
Utanríkisráðuneytið sagði í kjölfarið að sú tillaga hefði „snúið mjög að mannúðarhliðinni“ en ekki tekið til „grimmdarverka Hamas.“
Það var hins vegar gert í kanadísku tillögunni.
Á fundi utanríkismálanefndar í morgun var málið tekið fyrir og komst nefndin að samkomulagi um þingsályktunartillögu en þar er farið fram á vopnahlé á Gaza, að hryðjuverk Hamas samtakanna í Ísrael verði fordæmd og sömuleiðis árásir Ísraelsstjórnar á Gaza.
„Í nafni samstöðu“
Við upphaf þingfundar í dag tilkynnti Þórhildur Sunna Ævarsdóttir, þingkona Pírata og fyrsti flutningsmaður þingsályktunartillögunnar þar sem árásir Ísraelshers í Palestínu eru fordæmdar og kallað eftir tafarlausu vopnahléi af mannúðarástæðum, að hún yrði nú dregin til baka í nafni samstöðu.
Þórhildur Sunna sagði í ræðu sinni að í gær hafi verið liðinn mánuður frá því að átökin brutust út. Það hafi liðið mánuður án þess að utanríkisráðherra hefði fordæmt „þá skelfilegu stríðsglæpi sem við höfum orðið vitni að af hálfu ísraelshers,“ sagði Þórhildur Sunna, án þess að sami ráðherra hafi gert skýra kröfu um vopnahlé strax.
„Það var af þeim sökum sem ég lagði fram dagskrártillögu í gær til að þingið gæti rætt hver stefna íslands er í þessum málið, komist að sameiginlegri niðurstöðu og sent skýr skilaboð.“
Þá sagði hún að frá því að frá því að hún lagði dagskrártillöguna fram hefði orðið sú þróun að fram væri komin tillaga frá utanríkismálanefnd „sem sameinar alla flokka í skýrri tillögu sem er auðvitað ekki 100% eins og ég hefði orðað hana sjálf en er mikilvæg málamiðlun og sendir mikilvæg og skýr skilaboð bæði til ráðherra og alþjóðasamfélagsins um stöðuna og okkar afstöðu verði hún samþykkt.“
Hún sagðist því draga dagskrártillöguna sína til baka og sömuleiðis þingsályktunartillöguna sem að hún og níu aðrir þingmenn, þar á meðal tvær þingkonur Vinstri grænna höfðu lagt fram. Hún sagðist gera það „í nafni samstöðu.“
Segir tillöguna mikilvæg skilaboð frá Alþingi Íslendinga
Viðreisn greindi einnig frá því í upphafi þingfundar að þeirra þingsályktunartillaga sem fjallaði um viðbrögð við ástandinu fyrir botni Miðjarðarhafs, yrði dregin til baka.
„Sú tillaga sem utanríkismálanefnd hefur sameinast um er efnislega samhljóða þeirri tillögu okkar. Okkar tillaga var byggð á þeirri breytingartillögu sem Kanada lagði fyrir þing Sameinuðu þjóðanna og allir bandamenn okkar í Evrópu og víðar sættust á þá. Þannig að þróun mála í þinginu hér í dag hefur verið mjög ánægjuleg. Þingflokkur Viðreisnar dregur því þingsályktun sína til baka og við styðjum heilshugar þá lendingu sem náðist á fundi utanríkismálanefndar í morgun,“ sagði Sigmar Guðmundsson, þingmaður Viðreisnar.
Diljá Mist Einarsdóttir, þingkona Sjálfstæðisflokksins og formaður utanríkismálanefndar sagði í þinginu fyrir um stundu að tillaga nefndarinnar væri málamiðlun sem byggðist á ályktun Jórdaníu á allsherjarþingi Sameinuðu þjóðanna með breytingartillögu Kanada.
„Ég tek undir með háttvirtum þingmanni Þórhildi Sunnu Ævarsdóttur, varðandi það hversu mikilvægt það er að þessi málamiðlun hafi náðst um þessi mikilvægu skilaboð frá Alþingi Íslendinga,“ sagði Diljá og bætti við að hún hefði eftir samtal við forseta þingsins vilyrði fyrir því að málið kæmist á dagskrá á morgun ef Alþingi samþykkir það.
Athugasemdir