Einn skutull í höfuð. Annar í síðuna. Langreyður sem Hvalur 8 kom með að landi í hvalstöðinni í Hvalfirði fyrir birtingu í morgun var skotin með tveimur sprengjuskutlum.

Þannig má gera ráð fyrir því að fyrsta skotið hafi geigað, ekki drepið dýrið og að endurskot hafi verið nauðsynlegt.

Arne Feuerhahn, framkvæmdastjóri sjávarverndunarsamtakanna Hard to Port, samtaka sem annað sumarið í röð fylgjast náið með veiðunum, segir við Heimildina að hann telji að um kvendýr sé að ræða. „Á myndunum sést að annar skutullinn hæfði höfuð dýrsins.“

Þegar skutull hæfir bein springur hann ekki inni í dýrinu, líkt og hann er hannaður til að gera þegar hann kemst í snertingu við hold.

TilbúnirStarfsmenn Hvals hf. stóðu tilbúnir á hvalskurðarplaninu er langreyðurin var dregin á land.

Mynd: Boris Niehaus/Hard To Port

„Það hefur því þegar komið í ljós, sem er ekki óvænt í mínum huga, að veiðiaðferðir Hvals hf. hafa ekki batnað að neinu leyti,“ segir Arne.

Báðir bátar Hvals hf., Hvalur 8 og Hvalur 9, héldu til veiða í fyrradag. Samkvæmt fréttum veiddi Hvalur 8 fyrstu langreyðina um hádegisbil í gær. Hvalur 9 veiddi tvær í gær og er sá bátur væntanlegur að hvalstöðinni í Hvalfirði.

Svandís Svavarsdóttir matvælaráðherra heimilaði hvalveiðar á ný um mánaðamótin og setti nýja reglugerð sem hafði það hlutverk að „bæta umgjörð veiða á langreyðum“ líkt og sagði í fyrstu grein hennar. Skilyrði til veiðanna voru þrengd á ýmsa lund, m.a. má ekki veiða nema í dagsbirtu, aðeins af innan við 25 metra færi og skulu ytri skilyrði vera með þeim hætti að líkur séu til þess að aflífun fari fram samstundis. Skal í því tilliti líta til ölduhæðar, veðurskilyrða og skyggnis.

NærmyndGulu línurnar eru fastar í skutlunum. Sá fremri, dreginn fram með gulum kassa til útskýringar, virðist hafa hæft höfuð dýrsins og þá mögulega bein.

Mynd: Hard to port

Skotvinkill skal vera á bilinu 45-135° miðað við lengdaröxul dýrs en víkja má frá færi og skotvinkli „þegar skjóta þarf sært dýr fleiri en einu skoti til að tryggja sem skjótasta aflífun,“ segir í ennfremur í reglugerðinni. „Verklag skal vera til þess fallið að tryggja að langreyðar séu aflífaðar á þann hátt að það valdi dýrum sem minnstum sársauka og taki sem skemmstan tíma og séu ekki veiddar á þann hátt að valdi þeim óþarfa limlestingum eða kvölum.“

Eftirlitsaðilar, þ.e. Fiskistofa og Matvælastofnun, geta samkvæmt reglugerðinni krafist úrbóta á verklagi „sé það ekki til þess fallið að tryggja framangreind skilyrði“.

Hvalur hf. hefur heimild til veiða á 161 langreyði í ár. Í fyrra stóð vertíðin í hundrað daga og lauk 28. September. Á henni voru veidd 148 dýr. Matvælastofnun gerði alvarlegar athugasemdir við veiðarnar, m.a. að mörg dýr hafi verið skotin margsinnis, að sprengiskutlar hafi ekki sprungið og að sum dýranna hafi þurft að þola langt dauðastríð og miklar kvalir.