Þrír eigendur samskiptafyrirtækisins Aton JL, þeir Huginn Freyr Þorsteinsson, Agnar Lemack og Ingvar Sverrisson, auk Valdimars Halldórssonar sem situr til að mynda í stjórnum Orkuveitu Húsavíkur og Fríhafnarinnar, hafa stofnað fyrirtækið Hamarshyl utan um kaup á Gallup á Íslandi. 

Gallup sér meðal annars um að safna hvers kyns gögnum úr samfélaginu, til að mynda um fylgi stjórnmálaflokka, fjölmiðlaneyslu og viðhorf til ýmissa málefna. 

Í tilkynningu segir að markmið Hamarshyls með kaupunum sé að efla Gallup sem „sjálfstætt rannsóknarfyrirtæki sem sér almenningi, stofnunum og fyrirtækjum fyrir áreiðanlegum og traustum upplýsingum um stöðu og þróun íslensks samfélags og markaða.“

Gallup á Íslandi er dótturfyrirtæki Já og mun Hamarshylur kaupa allt hlutafé þess af Já. Þegar kaupin hafa gengið í gegn verður Gallup á Íslandi rekið sem sjálfstætt rannsóknarfyrirtæki og mun ný stjórn auglýsa eftir nýjum framkvæmdastjóra. Vilborg Helga Harðardóttir, forstjóri Já hf., er einnig framkvæmdastjóri Gallup á Íslandi og mun sinna því starfi áfram þar til gengið hefur verið frá ráðningu nýs framkvæmdastjóra.

Arctica Finance var ráðgjafi í söluferlinu og Ax Lögmannsþjónusta ráðgjafi kaupanda. Gallup hefur verið leiðandi á sviði markaðs-, starfsmanna-, og viðhorfsrannsókna á Íslandi og er með umboðið fyrir alþjóðlega vörumerkið Gallup en auk þess hefur fyrirtækið tengingar við fleiri alþjóðleg rannsóknarfyrirtæki. Starfsmenn Gallup á Íslandi eru um 50 talsins á tveimur starfsstöðvum, í Reykjavík og á Akureyri.