Fjölda gistinátta fjölgaði alls staðar á landinu í júní samanborið við sama mánuð í fyrra, nema á höfuðborgarsvæðinu. Þar fækkaði fjölda gistinátta í júnímánuði á milli ára, þrátt fyrir töluverða aukningu ferðamanna til landsins. Gistinóttum fjölgaði mest á Suðurlandi, um 13 prósent á milli ára. Fjöldi hótelherbergja á höfuðborgarsvæðinu stóð í stað á milli ára og þýða færri gistinætur því að nýting þeirra varð minni. Þetta sýna tölur Hagstofu Íslands um gistinætur í júní.
Gistinæturnar eru enn langflestar á höfuðborgarsvæðinu, jafnvel þó þær hafi verið 5252 nóttum færri nú en í fyrra. Samtals voru gistinæturnar 231.849 í júní síðastliðnum á höfuðborgarsvæðinu. Á Suðurlandi voru gistinæturnar 123.957 í júní núna en höfðu verið 109.340 í júní á síðasta ári. Nýtingin var að sama skapi einna mest á höfuðborgarsvæðinu, 80 prósent, en hún væri bæði hærri á Suðurlandi og Austurlandi, þar sem hún var 85,3 prósent og 82,4 prósent.
Jóhannes Þór Skúlason, framkvæmdastjóri Samtaka ferðaþjónustunnar, segir þetta ekki koma á óvart.
„Ég held að við séum að sjá í rauninni þróun sem er að verða af nokkrum orsökum. Við erum að koma út úr ári sem var mjög óvenjulegt,“ segir hann úr eigin sumarfríi, þar sem hann er truflaður af blaðamanni. Jóhannes segir að ferðamenn hafi hagað ferðalögum sínum með óvenjulegum hætti í fyrra, með lengri ferðum en íslensk ferðaþjónusta á að venjast. „Ferðamenn voru að gista fleiri nætur, jafnvel upp í það að ferðamenn eins og frá Þýskalandi voru að koma í þrjár vikur frekar en tvær,“ segir hann og bætir við að „Bandaríkjamenn voru að koma hingað og stoppa, bara sem dæmi, kannski í átta nætur í staðin fyrir fimm og í samhengi við það fara lengra út frá höfuðborgarsvæðinu, fara lengra um landið.“
Ferðavilji eftir COVID og uppsafnað sparifé hafi auðveldað ferðafólki frá löndum sem einna helst heimsækja Ísland að eyða meiru og vera lengur. „Svo það kemur ekki á óvart á þessu ári að sjá þetta dragast saman aftur. Við erum að sjá, miðað við kortaveltutölur, heldur minni eyðslu per ferðamann, heldur minni dvalarlengd en í fyrra, og svo framvegis,“ segir Jóhannes.
Meira kunni þó vel að spila inn í breytta hegðun ferðafólks.
„Verðin hafa farið töluvert hraðar upp hér eftir faraldurinn heldur en til dæmis í nágrannaborgunum á Norðurlöndunum og það hefur eflaust einhver áhrif líka á þá sem hafa hugsað sér að koma með stuttum fyrirvara.“
„Þeir sem eru að koma til Íslands ætla sér að stórum hluta að fara um landið og skoða náttúruna og það er bara töluvert erfiðara að fá gistirými þar sem framboð er minna víða um landið og það getur vel verið að fólk ákveði að koma síðar á árinu eða á næsta ári eða eitthvað slíkt og þess vegna gæti verið að þetta rými nýtist ekki jafn vel á höfuðborgarsvæðinu.“
„Verðin hafa farið töluvert hraðar upp hér eftir faraldurinn heldur en til dæmis í nágranna borgunum á Norðurlöndunum“
Fjöldi gistinátta sýnir að Suðurland stekkur upp á milli ára. Er þetta afleiðing þess að við höfum reynt að dreifa ferðamönnum?
„Já, ég myndi segja að við höfum náð umtalsverðum árangri í því á þessum undanförnum árum. Það hefur verið í rauninni frá því að Inspired by Iceland, eða Ísland allt árið, herferðin hófst, hefur verið eiginlega þessi tvöfalda mantra markaðssetningar á Íslandi þetta: Ísland allt árið og Ísland allt landið. Að minnka árstíðasveifluna og koma ferðamönnum víðar um land. Og þetta hefur tekist ótrúlega vel. Það er hægt að sjá á því að þegar þetta tímabil byrjaði þá vorum við mesta árstíðasveiflu á Norðurlöndum en núna erum við með minnsta, ef mig misminnir ekki, ef horft er á landið í heild.“
Jóhannes segir þó árstíðasveifluna meiri utan höfuðborgarsvæðisins en innan þess. Verkefnið að ná þeim sveiflum niður gangi hraðar en að dreifa ferðamönnum, sem þó hafi gengið ágætlega.
„Það hefur gengið að mörgu leyti vel líka þó við hefðum gjarnan viljað sjá hraðari þróun á því,“ segir hann.
Þó að hver og einn skuli vera að eyða minna en í fyrra og gistinóttum fækkað á höfuðborgarsvæðinu eru heilt yfir fleiri gistinætur að seljast og fleiri að koma til landsins en áður. Samkvæmt tölum Hagstofunnar eru uppsafnaðar gistinætur í ár orðnar hátt í 4,1 milljón talsins samanborið við 3,5 milljónir á sama tímapunkti í fyrra, og útlit fyrir að gistinætur á ársgrundvelli fari í fyrsta sinn yfir 9 milljónir í ár.
Athugasemdir