„Frá okkar sjónarhóli þá leiddi framkvæmdin til frábærrar fjárhagslegrar niðurstöðu ríkissjóðs og farsæls útboðs,“ segir Jón Gunnar Jónsson, forstjóri Bankasýslu ríkisins. 

Hann er enn á þeirri skoðun að útboð Íslandsbanka á 22,5 prósenta hlut ríkisins í bankanum hafi verið farsælasta útboð Íslandssögunnar, þrátt fyrir að skýrsla Fjármálaeftirlitsins (FME) um útboðið hafi leitt í ljós alvarleg lögbrot af hálfu Íslandsbanka.

Telur þú að þið hafið gert einhver mistök?

„Nei,“ segir Jón Gunnar. 

Bankasýslan annaðist útboðið ásamt Íslandsbanka en í skýrslu FME kemur fram að bankinn hafi veitt Bankasýslunni villandi upplýsingar og blekkt stofnunina.

Ríkisstjórnin sagðist í kjölfar útboðsins ætla að leggja Bankasýsluna niður. Það hefur þó ekki raungerst og segist Jón Gunnar ekki vita hvort það muni gerast. 

Er enn þörf á ykkur?

„Ég ætla ekki að leggja mat á það en við erum kallaðir fyrir þingnefnd svo það hlýtur að vera eitthvað vit í þvi sem við erum að leggja fram,“ segir Jón Gunnar og vísar til fundar efnahags- og viðskiptanefndar sem hann sat fyrir svörum á í dag.