Til stendur að greina ítarlega frá brotum Íslandsbanka á mánudag

Sáttin sem Íslands­banki und­ir­gengst við Fjár­mála­eft­ir­lit Seðla­banka Íslands verður birt á mánu­dag. Ekki er enn búið að skrifa undir hana og hefur stjórn bank­ans fram á morgun til að gera það. Hluti af sátt­inni er birt­ing á upp­lýs­ingum um hver nákvæm­lega brot Íslands­banka voru. Það verður gert á mánu­dag, sam­kvæmt upp­lýs­ingum Heim­ild­ar­innar. 

Full­trúar Seðla­bank­ans hafa ekki viljað tjá sig um málið; hvorki þegar það var til rann­sóknar né núna, þegar ljóst er að mál­inu er við það að ljúka. „Þegar bank­inn hefur afhent Seðla­bank­anum und­ir­rit­aða sátt þá verður hún birt eins venja er. Í sátt­inni koma fram máls­at­vik og nið­ur­staða máls­ins,“ sagði í skrif­legu svari Seðla­bank­ans til Heim­ild­ar­innar nú í morgun. 

Í til­kynn­ingu Íslands­banka um sekt­ina í gær segir að bank­inn hafi í raun sjálfur verið, í meg­in­at­riðum, búinn að kom­ast að sömu nið­ur­stöðu og Seðla­bank­inn um hvaða brot hefðu verið framin. Bankinn gjald­færði þó aðeins 300 millj­ónir vegna yfir­vof­andi sektar, sem end­ur­speglar að ein­hverju leyti mat bank­ans á hversu alvar­lega brotin væru litin. Sektin er því 860 millj­ónum krónum hærri en stjórn­endur bank­ans gerðu ráð fyrir. 

Það er þó langt frá þeirri hámarks­sekt sem fjár­mála­eft­ir­liti Seðla­bank­ans er heim­ilt að leggja á Íslands­banka. Sekt­ar­fjár­hæðir mega nema allt að tíu pró­sent af heild­ar­veltu sam­kvæmt síð­asta sam­þykkta árs­reikn­ingi. Í til­felli Íslands­banka eru það hátt í sex millj­arðar króna.