Utanríkisráðuneytið hefur tilkynnt að úrvinnsla fyrirspurnar sem því barst frá Bergþóri Ólasyni, þingmanni Miðflokksins, um kostnað við leiðtogafund Evrópuráðsins hafi reynst tímafrekari en áður var ætlað. Það hefur því óskað eftir fresti til 30. júní til að svara henni.
Fyrirspurnin var lögð fram 27. apríl og samkvæmt þingsköpum á að svara henni innan 15 virkra daga. Það tókst ekki. Þegar sá frestur var liðinn óskaði utanríkisráðuneytið eftir fresti til 12. júní til að svara fyrirspurninni. Í dag var svo send önnur tilkynning til forseta Alþingis þar sem óskað var eftir enn lengri fresti til að svara henni.
Bergþór vildi fá að vita hver áætlaður heildarkostnaður við leiðtogafundinn væri og hvernig hann skiptist milli opinberra aðila. Hann vildi líka fá að vita hvernig kostnaðurinn skiptist milli verkþátta, svo sem öryggisgæslu, skipulagningar og svo framvegis.
Áætluðu að kostnaðurinn yrði tveir milljarðar
Leiðtogafundur Evrópuráðsins fór fram í Reykjavík þriðjudaginn 16. maí og miðvikudaginn 17. maí. Þangað mættu um 40 þjóðarleiðtogar, auk þess sem Volodomyr Zelensky, forseti Úkraínu, ávarpaði fundinn í gegnum fjarfundarbúnað. Alls komu um 900 manns til landsins vegna fundarins. Samkvæmt upplýsingum sem settar voru fram á vef stjórnarráðsins í aðdraganda fundarins átti beinn kostnaður við framkvæmd fundarins að vera nálægt tveimur milljörðum króna.
Sautján hótel í miðborg Reykjavíkur voru nýtt undir þjóðarleiðtoga, fylgdarlið og gesti þegar leiðtogafundur Evrópuráðsins stóð yfir. Auk þess voru tugir glæsibíla fluttir hingað til lands, sem meðal annars voru notaðir í fylgdarakstur leiðtoganna.
Löggæsla dýrasti verkþátturinn
Öryggisgæsla vegna fundarins var mun meiri en Íslendingar eiga almennt að venjast. Nær allir lögreglumenn landsins og erlendir lögreglumenn komu að verkefninu. Við Hörpuna voru vopnaðir lögreglumenn í tugatali, með hríðskotabyssur, leyniskyttur voru á þökum nærliggjandi húsa og búið að loka allri umferð um svæðið.
Greint hefur verið frá því að stærsti kostnaðurinn í tengslum við fundinn fór í löggæslu og var hann áætlaður í kringum 1,3 milljarð króna. Innifalið í honum voru kaup á vopnum og öðrum vopnabúnaði. Auk þess hefur komið fram að alls 250 jakkaföt hafi verið keypt fyrir óeinkennisklædda lögreglumenn vegna fundarins. Samskiptastjóri ríkislögreglustjóra vildi ekki gefa upp kostnað vegna þeirra kaupa þegar Heimildin óskaði eftir því í lok apríl og bar fyrir sig öryggisástæður.
Sigríður Björk Guðjónsdóttir ríkislögreglustjóri sagði í samtali við Heimildina eftir að fundurinn var afstaðinn að endanlegur kostnaður við hann myndi hins vegar ekki liggja fyrir fyrr en eftir að ráðstefnan yrði gerð upp.
Hefur ekki sannast að öll þessi goverment spending á sjálfan sig hefur ekki gert goverment betri …heldur frekar lélegri. Nú eru bara fleiri aðstoðarmönnum um að kenna… Sem kannski er tilgangurinn ?!