Fyrri mynd:

Hvaða ár var þessi fræga ljósmynd tekin?

Seinni mynd:

Hver er þetta?

1.  Hver var fyrsta konan sem var leikhússtjóri á Íslandi?

2.  Hver er stærsta kattartegund heimsins nú um stundir?

3.  Stytta af hvaða skáldi er næst Hljómskálanum í Reykjavík?

4.  Hvaða fótboltalið frá Spáni vann Evrópudeildina í karlaflokki í úrslitaleik fyrir viku síðan?

5.  Hver skrifaði skáldsöguna Gerplu?

6.  Hvaða íslenski banki kom á fót á sínum tíma hinum alræmdu Icesave-reikningum?

7.  Við brúðkaup í tilteknu þorpi urðu veisluhaldarar uppiskroppa með vín. Þar sem Jesús var einn af veislugestunum reyndist þó auðvelt að redda því. En hvar var þetta brúðkaup haldið?

8.  Hver er fimmta reikistjarnan frá sólinni?

9.  Nelson Piquet heitir karl einn sem nú er sjötugur en varð á níunda áratug síðustu aldar þrisvar heimsmeistari í tiltekinni grein. Hvaða grein var það? – og svarið þarf að vera hárnákvæmt!

10.  Hvað fann litla gula hænan?

11.  Hver samdi ljóðabókina Enginn dans við Ufsaklett: Ástin ein taugahrúga – og fékk tilnefningu til bókmenntaverðlauna Norðurlandaráðs?

12.  Í hvaða Evrópulandi er borgin Poznań?

13.  Sú mynd sem flestir hafa lækað á Instagram (rúmlega 75 milljón manns) var tekin 18. desember síðastliðinn, sem sé 2022. Raunar er um að ræða nokkrar myndir en langmest ber á einum ungum karlmanni. Hver ætli það sé?

14.  Við hvaða þéttbýlisstað er Robert James Fischer grafinn?

15.  Jórunn Sigurðardóttir lét af störfum hjá RÚV Rás eitt fyrir viku en hún hafði í árafjöld annast þar vinsælan þátt sem nefnist Orð um ... hvað?

Svör við myndaspurningum:

Fyrri myndin var tekin við innrásina í Normandí 1944. Seinni myndin er af söngkonunni Bríeti.

Svör við öðrum spurningum:

1.  Vigdís Finnbogadóttir.  –  2.  Tígrisdýrið.  –  3.  Jónas Hallgrímsson.  –  4.  Sevilla.  –  5.  Halldór Laxness.  –  6.  Landsbankinn.  –  7.  Í Kana.  –  8.  Júpíter.  –  9.  Í Formúlu 1.  Kappakstur dugar ekki!  –  10.  Fræ.  –  11.  Elísabet Jökulsdóttir.  –  12.  Póllandi.  –  13.  Leo Messi. Myndin er af fagnaðarlátum hans og félaga hans í argentínska landsliðinu í fótbolta þegar Argentínumenn urðu heimsmeistarar.  –  14.  Selfoss.  –  15.  Bækur.