Volodymyr Zelensky, forseti Úkraínu, mun flytja ávarp á opnunarathöfn leiðtogafundar Evrópuráðsins í Reykjavík sem hefst síðar í dag. Hann mun þó ekki gera það í eigin persónu heldur í gegnum fjarfundarbúnað. 

Frá þessu er greint í tilkynningu frá utanríkisráðuneytinu sem send var út í dag. Þar kemur fram að Denys Shmyhal, forsætisráðherra Úkraínu, muni leiða sendinefnd landsins á fundinum. Auk hans mun Denys Maliuska dómsmálaráðherra mæta á fundinn. 

Zelensky hefur verið á ferð um Evrópu síðustu daga. Hann kom óvænt til Bretlands í gær og fundaði með þarlendum ráðamönnum. Miklar bollaleggingar urðu í kjölfarið um að Zelensky væri að feta sig til Íslands þar sem hann yrði viðstaddur leiðtogafundinn. Samkvæmt tilkynningu íslenska utanríkisráðuneytisins verður ekki af því. 

Búist er við um 40 leiðtogum ríkja sem tilheyra Evrópuráðinu á fundinn. Hann hefst í dag og lýkur síðdegis á morgun, miðvikudag, með því að einhvers konar niðurstaða hans verður gerð opinber. Búist er við því að sú niðurstaða verði í formi sameiginlegrar yfirlýsingar sem tekur meðal annars á því hvernig til standi að láta Rússa bæta það tjón sem þeir hafa valdið með stríðsrekstri sínum í Úkraínu.