Allt að 900 starfsmenn skóla og frístundaheimila gætu lagt niður störf

Á hádegi í dag hefj­ast fyrstu atkvæða­greiðsl­urnar um verk­falls­að­gerðir vegna kjara­deilu ell­efu aðild­ar­fé­laga BSRB við Samband íslenskra sveit­ar­fé­laga. Fyrstu aðgerð­irnar eru áform­aðar í Kópavogi, Garðabæ, Sel­tjarna­nesi og Mos­fellsbæ í maí og júní, en þar mun starfs­fólk leik­skóla, grunn­skóla og frí­stunda­heim­ila leggja niður störf ef verk­falls­boðun verður sam­þykkt.

Atkvæða­greiðsl­unni lýkur á hádegi á laug­ar­dag. Samkvæmt upp­lýs­ingum sem Heim­ildin fékk frá BSRB ná áform­aðar aðgerðir til um 900 starfs­manna í sveit­ar­fé­lög­unum fjórum.

Misjafnt er á milli sveit­ar­fé­lag­anna fjög­urra hvort allir félags­menn aðild­ar­fé­laga BSRB greiði atkvæði um verk­falls­að­gerð­irnar eða ein­ungis starf­menn þeirra stofn­ana sem verk­falls­að­gerð­irnar ná til.

Segja Sambandið neita að leiðrétta mismunun á launum

Í til­kynn­ingu frá BSRB segir að kjara­deilan snúi að sam­eig­in­legri kröfu BSRB-félaga um að starfs­fólk sveit­ar­fé­laga, m.a. starfs­fólk leik­skóla, grunn­skóla, sund­lauga, íþrótta­mið­stöðva og starfs­fólk í þjón­ustu við fatlað fólk, fái sömu laun fyrir sömu eða sam­bæri­leg störf innan sömu stofn­unar eða sveit­ar­fé­lags og aðrir hafi þegar fengið frá 1. jan­úar.

„Þar sem Samband íslenskra sveit­ar­fé­laga neitar að leið­rétta aug­ljósa mis­munun á launum starfs­fólks, og fundir með rík­is­sátta­semj­ara hafa engu skilað, er næsta skref að félags­fólk greiði atkvæði um verk­falls­að­gerðir svo knýja megi við­semj­endur okkar til samn­inga,“ segir í til­kynn­ing­unni. 

Kjara­deilan, sem er á milli ell­efu félaga starfs­manna sveit­ar­fé­laga, snertir samn­inga alls um 7.000 starfs­manna.

Aðgerðir fyrirhugaðar víðar um landið

Ef verk­falls­boð­unin verður sam­þykkt verður fyrsta lota verk­falla dag­ana 15. og 16. maí í leik­skólum, grunn­skólum og frí­stunda­heim­ilum Kópavogs, Garða­bæjar, Sel­tjarn­ar­ness og Mos­fells­bæjar, en greidd eru atkvæði um frek­ari aðgerðir sem ná fram í júní­mánuð.

Á næstu dögum koma fleiri BSRB-félög til með að boða til atkvæða­greiðslu um aðgerðir, en aðgerðir eru sagðar fyr­ir­hug­aðar í Hafn­ar­firði, Ölfusi, Árborg, Vest­manna­eyjum, Reykja­nesbæ og víðar um landið. Alls gætu 1.500 manns um land allt lagt niður störf í þeim aðgerðum sem eru áform­aðar, verði sam­þykkt að ráð­ast í þær. 

Sveitarfélögin sýni starfsfólki sínu „ótrúlega óbilgirni“

Í frétta­til­kynn­ingu BSRB er haft eftir Sonju Ýr Þor­bergs­dóttur for­manni að sú staða sem uppi er í kjara­við­ræð­unum komi mjög á óvart, þar sem BSRB hafi farið fram með mjög hóf­samar kröfur til skamms tíma.

„Hins vegar virð­ist Samband íslenskra sveit­ar­fé­laga hafa skilið eftir samn­ings­vilj­ann heima og sýnir starfs­fólki sveit­ar­fé­laga ótrú­lega óbil­girni. Um er að ræða hreina mis­munun þar sem fólk sem vinnur jafn­vel sömu störf, á sama vinnu­stað, með sömu starfs­heiti er boðið upp á mis­jöfn kjör. Auðvitað sættir sig eng­inn við slíkt,“ er haft eftir Sonju Ýr.