„Eins og fram hefur komið í fjölmiðlum átti ráðherra óformlegt samtal við forstjóra Íslenskrar erfðagreiningar þar sem þeir ræddu m.a. þá þróun sem hefur átt sér stað innan geðlæknisfræðinnar er varðar meðferð þar sem notast er við hugvíkkandi efni. Það er vel þekkt að margir einstaklingar innan fullnustukerfisins glíma við margháttaðan geðrænan vanda og er að mati ráðherra rétt að skoða allar hugmyndir og nýjungar er varðar bætta meðferð og þjónustu við þennan hóp.“ 

Þetta segir Jón Gunnarsson dómsmálaráðherra í skriflegu svari við fyrirspurn Jóhanns Páls Jóhannssonar, þingmanns Samfylkingarinnar, um hvort ráðherrann hafi viðrað þá hugmynd við Kára Stefánsson, forstjóra Íslenskrar erfðagreiningar, að gerðar yrðu tilraunir með hugvíkkandi efni á 30 föngum í íslenskum fangelsum.

Tilefni fyrirspurnar var að Jón lét hafa eftir sér í hlaðvarpsþætti í síðasta mánuði að hann hefði viðrað það, í óformlegu spjalli við Kára, að gera tilraunir á rannsóknum með hugvíkkandi efni á þremur tugum fanga í því skyni að reyna að bæta lífsgæði þeirra. Dæmi um þau hugvíkkandi efni sem um ræðir eru LSD, ketamín, DMT, MDMA og sílósíbín sem unnið er úr ofskynjunarsveppum. Víða er fari ðað nota slík efni í meðferð við þunglyndi, kvíða og áfallastreituröskun en þau eru, enn sem komið er, að mestu ólögleg sem meðferðarefni hérlendis. 

Í svari sínu við fyrirspurn Jóhanns Páls segir Jón að það væri aldrei í verkahring dómsmálaráðherra ða taka ákvarðanir um læknisfræðilegar tilraunir, og vísaði í forsetaúrskurð stjórnmálaefna milli ráðuneyta í Stjórnarráði Íslands því til stuðnings. „Í samræmi við það hefur ekki verið sett af stað vinna innan ráðuneytisins hvað þetta varðar.“