Efling hefur sett fram kröfu um að Aðalsteinn Leifsson ríkissáttasemjari víki sæti í kjaradeilu Eflingar og Samtaka atvinnulífsins. Þetta staðfestir Sólveig Anna Jónsdóttir, formaður Eflingar. Segir hún Aðalstein ekki njóta trausts samninganefndar stéttarfélagsins.

Fyrr í dag kvað Héraðsdómur Reykjavíkur upp úrskurð í aðfararbeiðni ríkissáttasemjara á hendur Eflingu, þar sem stéttarfélagið var krafið um að afhenda kjörskrá sína í þeim tilgangi að ríkissáttasemjari geti látið fara fram allsherjaratkvæðagreiðslu meðal félagsmanna um miðlunartillögu sína. Þeim úrskurði hefur Efling áfrýjað til Landsréttar.

„Um leið og dómsorð var upp kveðið gekk lögmaður Eflingar eftir því að fá staðfest hvort réttaráhrifum úrskurðarins væri frestað eða ekki. Þeim er ekki frestað og þá samstundis sagði hann að dómnum yrði áfrýjað til Landsrétt. Við munum krefjast flýtimeðferðar þar og teljum að meðan að málið er fyrir æðra dómstigi eigum við ekki að afhenda kjörskránna. Það er okkar afstaða,“ segir Sólveig Anna.

Í dómsorði segir að hafna beri þeim rökum Eflingar að með því að afhenda kjörskrá sé verið að vega að rétti einstakra félagsmanna til friðhelgi einkalífs. Þvert á móti sé allsherjar atkvæðagreiðsla um miðlunartillögu í samræmi við lýðræðishefðir og eðlilegt að leggja slíka tillögu undir sem flesta.

Sólveig Anna segir að niðurstaðan í héraðsdómi hafi ekki komið henni á óvart. „Mér fannst þau rök sem lögmaður Eflingar setti fram mjög afdráttarlaust góð og skýr. Ég er mjög ósátt við þessa niðurstöðu, ég tel hana ranga og ósanngjarna, en ég ætla ekki að segja að hún komi mér á óvart. Nú veit ég hins vegar ekkert hvað mun gerast, kannski er löggan bara að fara að mæta hérna á skrifstofur Eflingar.“

Spurð hvað hún, eða Eflingarfólk, muni gera ef lögreglan mætir á skrifstofur Eflingar til að sækja kjörskrá félagsins vildi Sólveig Anna ekki tjá sig um það.

Var orðin svartsýn

En fleiri dómar voru uppkveðnir í dag. Þannig féll dómur í máli Samtaka atvinnulífsins á hendur Eflingu fyrir Félagsdómi í dag, þar sem verkföll Eflingar voru dæmd lögmæt. Sólveig Anna fagnar niðurstöðunni mjög. „Ég var alveg farin að búa mig undir að við myndum tapa í Félagsdómi líka, ég var orðin nokkuð svartsýn. En það var þó, og er, mín afdráttarlausa afstaða að málatilbúnaður Samtaka atvinnulífsins í málinu hafi verið, og sé, svo fjarstæðukenndur, svo fráleitur og ósvífinn, að hefði Félagsdómur dæmt þeim í vil þá hefði það fært alla verkalýðshreyfinguna, öll samskipti aðila á vinnumarkaði og allt umhverfið sem við störfum innan á einhvern nýjan og hræðilegan stað. Og ég fagna því af öllu hjarta að við höfum ekki verið færð á þann skelfilega stað.“

Verkföll Eflingarfólks á Íslandshótelum hefjast á hádegi á morgun. Sólveig Anna segir að fólk sé í baráttuhug. Samninganefnd muni hitta Eflingarfólk sem er í vinnustöðvun í Iðnó á hádegi til að fara yfir stöðu mála.

Þá lýkur atkvæðagreiðslu um verkfallsboðanir Eflingarstarfsmanna á Berjaya hótelkeðjunni, á Reykjavík Edition hótelinu, hjá Skeljungi og Olíudreifingu og bílstjóra hjá Samskipum, annað kvöld klukkan sex. Búast má við að niðurstöður atkvæðagreiðslnanna liggi fyrir þegar líður á kvöldið. Verði verkfallsboðanirnar samþykktar hefjast verkföll á þessum vinnustöðum 15. febrúar næstkomandi, hafi miðlunartillaga ríkissáttasemjara ekki verið samþykkt í millitíðinni.