Samfylkingin heldur áfram að bæta við sig fylgi samkvæmt nýrri könnun Maskínu. Í könnun sem fyrirtækið gerði 13. til 18. janúar mældist fylgi flokksins 23,6 prósent. Fylgið hefur aukist um 3,5 prósentustig síðan síðasta könnun Maskínu var birt í lok síðasta árs og um 13,7 prósentustig frá síðustu kosningum, þegar flokkurinn fékk 9,9 prósent atkvæða. 

Samfylkingin mælist nú með meira fylgi en Framsóknarflokkur og Vinstri græn til samans en samanlagt fylgi þeirra flokka, sem báðir sitja í ríkisstjórn með Sjálfstæðisflokki, mælist 20,4 prósent. 

Allir ríkisstjórnarflokkarnir hafa tapað fylgi það sem af er kjörtímabili. Sjálfstæðisflokkurinn minnst, en hann mælist með 21,8 prósent fylgi eftir að hafa fengið 24,4 prósent atkvæða haustið 2021. Framsóknarflokkurinn hefur tapað mestu, en fylgi hans hefur farið úr 17,3 í 12,1 prósent. Vinstri græn mælast nú sjötti stærsti flokkur landsins með 8,2 prósent fylgi, en flokkur Katrínar Jakobsdóttur forsætisráðherra fékk 12,6 prósent atkvæða í síðustu kosningum. 

Samanlagt hafa stjórnarflokkarnir þrír tapað 12,2 prósentustigum það sem af er kjörtímabili og mælast með 42,1 prósent fylgi. Það er nokkuð langt frá því að duga til áframhaldandi stjórnarsetu ef kosið yrði í dag og niðurstaða Maskínu kæmi upp úr kjörkössunum. 

Aðrir flokkar sem hafa bætt við sig fylgi á kjörtímabilinu, utan Samfylkingarinnar, eru Píratar og Viðreisn. Píratar hafa bætt við sig 1,8 prósentustigi og mælast með 10,4 prósent fylgi og Viðreisn 0,8 prósentustig, en fylgi flokksins mælist nú 9,1 prósent. 

Flokkur fólksins, sem mælist með 6,9 prósent fylgi, og Miðflokkurinn, sem mælist með 5,1 prósent, njóta báðir minni stuðnings nú en þeir gerðu í lok september 2021. Sömu sögu er að segja af Sósíalistaflokki Íslands, sem náði ekki inn á þing í síðustu kosningum en komst afar nálægt því. Fylgi hans mælst nú 3,6 prósent. Það minnkar um 2,5 prósentustig frá síðustu Maskínukönnun sem gerð var í lok síðasta árs.  

Athygli vekur að sameiginlegt fylgi þeirra þriggja stjórnarandstöðuflokka sem oft eru kallaðir hin frjálslynda miðja: Samfylkingin, Píratar og Viðreisn, mælist nú 43,1 prósent. Þessir þrír flokkar mælast því með meira fylgi en ríkisstjórnarflokkarnir sem stendur.