Lögreglan rannsakar hvort manni hafi verið ráðinn bani með eggvopni í Ólafsfirði í nótt. Fjórir eru í haldi vegna málsins og hafa þeir allir stöðu sakbornings í rannsókn lögreglunnar. Þetta kemur fram í Facebook-tilkynningu lögreglunnar á Norðurlandi eystra. 

Þar segir að óskað hafi verið eftir aðstoð lögreglu í húsi í Ólafsfirði klukkan 2.34 í nótt þar sem maður hafði verið stunginn með eggvopni. Lögreglumenn frá Akureyri og Tröllaskaga voru sendir á vettvang sem og sérsveitarmenn frá Akureyri. Síðar komu sjúkraflutningamenn og læknir á staðinn en tilraunir til endurlífgunar tókust ekki. 

„Rannsókn málsins er á algjöru frumstigi og mikil vinna lögreglu framundan. Vegna rannsóknarhagsmuna er því ekki hægt að veita frekari upplýsingar um það að svo komnu,“ segir í tilkynningunni. Þar kemur einnig fram að ákveðið verði síðar í dag hvort farið verði fram á gæsluvarðhald yfir einhverjum þeirra fjögurra sem eru nú þegar í haldi.