Fyrri aukaspurning:

Hver er konan á myndinni hér að ofan?

***

Aðalspurningar:

1.  Á mótum hvaða ríkja er Dauðahafið?

2.  Níturoxíð eða N₂0 er litlaus gastegund sem er notuð til ýmissa hluta og hefur það sér m.a. til ágætis að vera ekki eldfim. Gasið er þó blandað út í ýmiss konar eldsneyti, bæði í eldflaugum, kappakstursbílum o.fl. Upphaflega var gasið einkum notað við deyfingar og er það jafnvel enn. Hvað er útbreiddasta nafnið á níturoxíði? 

3.  Hvað nefnist sá hluti Danmerkur sem er áfastur meginlandi Evrópu?

4.  Í hvaða ríki er borgin Auckland?

5.  Reyndar er til annað nafn á þeirri borg: Tāmaki Makaurau. Á hvaða tungumáli heitir Auckland þessu nafni?

6.  Hver er menntun Guðna Th. Jóhannessonar forseta Íslands?

7.  Hvað nefnist nú bær eða borg sem fyrrum hét Godthåb?

8.  Borg ein er í tíunda sæti yfir evrópskar borgir að mannfjölda. Á tímum Rómverja var hún um tíma kölluð Lutetia. Hvað heitir hún nú?

9.  Árið 2020 skipti smáþorpið Fucking um nafn. Í þorpinu búa aðeins rúmlega 100 manns og þeir höfðu lengi vel góðan húmor fyrir því hvaða hugrenningatengsl vöknuðu hjá þeim sem sáu nafnið, en að lokum voru íbúarnir samt farnir að hafa ama af nafninu, og þá var nafninu sem sé breytt. En í hvaða ríki var þorpið Fucking? Og svo fæst eitt Fucking-aukastig fyrir að vita hvaða nafn er nú á þorpinu.

10.  Aventinus, Capitolinus, Caelius, Esquilinus, Palatinus, Quirinalis, Viminalis. Hvaða sjö nöfn eru þetta?

***

Seinni aukaspurning:

Hver er þessi kona hér?

***

Svör við aðalspurningum:

1.  Ísraels og Jórdaníu.

2.  Hláturgas.

3.  Jótland.

4.  Nýja Sjálandi.

5.  Maórísku.

6.  Hann er sagnfræðingur.

7.  Nuuk.

8.  París.

9.  Fucking var í Austurríki en nefnist nú Fugging.

10.  Nöfnin á hinum sjö hæðum Rómaborgar.

***

Svör við aukaspurningum:

Á efri mynd er Olivia Newton John.

Á neðri mynd er Guðrún Agnarsdóttir.