Sig­mundur Davíð Gunn­laugs­son, for­maður Mið­flokks­ins og fyrr­ver­andi for­sæt­is­ráð­herra, hefur hætt við að flytja ræðu á umdeildri ráð­stefnu í Svíþjóð. Þetta kemur fram í svari hans við tölvu­pósti frá sænska blað­inu Dagens Nyheter.

„Ég var beð­inn um að taka þátt á sænsku ráð­stefn­unni til að veita inn­sýn inn í reynslu Íslands við að glíma við fjár­málakreppu í ljósi núver­andi þró­unar efna­hags­mála,“ segir Sig­mundur Davíð í svari sínu til blaðs­ins. „Ég neydd­ist til að hætta við þátt­töku mína vegna þing­starfa á Íslandi.“

Sig­mundur Davíð hafði ekki svarað sím­tölum og tölvu­póstum Stund­ar­innar vegna máls­ins.

Segir ekkert um afstöðu sína til ráðstefnunnar

Stundin og Expo hafa í gær og í dag sagt frá fyr­ir­hug­aðri þátt­töku Sig­mundar Davíðs í Sænsku bóka- og fjöl­miðla­mess­unni sem fram fer í Stokk­hólmi 20. ágúst. Sig­mundur Davíð hefur verið aug­lýstur sem ræðu­maður á ráð­stefn­unni sem opin­ber­lega er kynnt sem vett­vangur umræðna um tján­ing­ar­frelsi, en er í raun skipu­lögð af sam­tökum sem hafa það að mark­miði að tengja saman aðila með ólíkar áherslur innan þjóð­ern­isöfga­hreyf­ingar Sví­þjóðar og efla hana.

Í svari Sig­mundar Davíðs til Dagens Nyheter kemur ekk­ert fram um afstöðu hans til ráð­stefn­unnar, skipu­leggj­enda þeirra eða ræðu­manna. Í athugun Stund­ar­innar og Expo kemur fram að þorri ræðu­manna til­heyra hægriöfga­hópum, -stjórn­mála­flokkum eða starfa hjá miðlum sem dreifa slíkum áróðri. Fimmt­ungur ræðu­manna hefur starfað með hægriöfga­flokknum Alt­ernativ för Sverige og þrettán af ræðu­mönn­unum hafa lofað Nas­ista­flokk Hitlers eða afneitað Hel­för­inni.

Hefur for­maður Mið­flokks­ins ekki svarað því til hvort hann hafi þekkt til bak­grunns ræðu­manna og skipu­leggj­enda ráð­stefn­unnar eða þekkt til þeirra per­sónu­lega.

Umræður um Íslandsbankaskýrsluna ástæðan

Í sam­tali við Vísi seg­ist Sig­mundur Davíð ekki vita hverjar skil­grein­ingar blaða­manna á þjóð­ern­isöfga­mönnum séu. „Ég kemst hvort sem er ekki á þessa hátíð síðan legið hefur fyrir að skýrsla Rík­is­end­ur­skoð­unar um sölu á hlut rík­is­ins í Íslands­banka verður til umræðu á sama tíma,“ segir hann.

„En ég sé að þarna eru ýmsir með erindi, meira að segja fyrr­ver­andi for­maður Sænska komm­ún­ista­flokks­ins, og líka einn af for­sprökkum umhverf­is­vernd­ar­sam­taka sem heita Extinciton Rebellion. Þarna eru ljóð­skáld, rit­höf­undar og hinir og þessir. Greini­lega fjöl­breyttur hópur en verður því miður að vera án mín að þessu sinni.“

„Greini­lega fjöl­breyttur hópur en verður því miður að vera án mín að þessu sinni“

Eins og fram hefur komið í umfjöllun Stund­ar­innar og sænska fjöl­mið­ils­ins Expo sem sér­hæfir sig í rann­sóknum á starf­semi hægriöfga­hópa eru skipu­leggj­endur ráð­stefn­unnar virkir innan slíkra hópa og 60 pró­sent ræðu­manna sem þar koma fram sömu­leiðis.

„Ég reyni yfir­leitt að verða við því þegar ég er beð­inn um að tala um eitt­hvað sem ég hef áhuga á,“ segir Sig­mundur Davíð við Vísi að lokum. „Ég hef meira að segja haldið erindi hjá Vinstri grænum.“