„Nei, ég nota þennan hjálm oft,“ segir Kjartan Magnússon, varaþingmaður og þriðji maður á lista Sjálfstæðisflokksins fyrir borgarstjórnarkosningar. Umræða hefur sprottið upp á netinu eftir að kosningaauglýsing flokksins var birt þar sem Kjartan sést bregða fyrir á hjóli og með reiðhjólahjálm. Það eru þó ekki hjólahæfileikarnir sem vekja athygli heldur hjálmurinn. Margir vilja meina að hann snúi öfugt.

Kjartan blæs á þessar útleggingar. „Ég hjóla nú töluvert,“ segir hann aðspurður. Á það bendir líka Snorri Stefánsson lögmaður í hópnum Samgönguhjólreiðar, þar sem hjálmanotkunin hefur einnig vakið athygli. „Það má alveg hafa gaman af þessu en hann hjólar í alvörunni,“ segir hann. Snorri er sambýlismaður keppinautar Kjartans í borgarstjórnarkosningunum en hann býr með Líf Magneudóttur, oddvita Vinstri grænna. 

Til að taka af allan vafa sótti Kjartan hjálminn og kíkti á hann. „Ég náði nú í hjálminn af því þú ert að spyrja að þessu og er með hann hérna fyrir framan mig og þetta er bara þannig hjálmur að það er ekki hægt að hafa hann öfugan. Þá myndi hann ekki tolla á höfðinu á mér.“

Kjartan er þó ekki eini frambjóðandinn sem hefur sést hjóla í kosningabaráttunni. Það hefur Pawel Bartoszek, annar maður á lista Viðreisnar, líka gert. Í auglýsingu frá flokknum sést hann bruna – hjálmaður – yfir Lækjartorg á reiðhjóli og augnabliki síðar – hjálmlaus – á rafskútu. 

Báðir flokkar hafa sérstaka stefnu í hjólamálum innan borgarinnar. Eitt af sjö kosningaloforðum Sjálfstæðisflokksins varðandi samgöngur gengur út á að  „innleiða hjólreiðaáætlun Reykjavíkurborgar af metnaði og styðja enn betur við hjólreiðar sem samgöngumáta í borginni“.

Viðreisn minnist átta sinnum á hjól í stefnuskrá sinni og ætlar meðal annars að klára þarf samfellt hjólastíganet fyrir borgina og samræma útlit og hönnun hjólastíga með nágrannasveitarfélögum. „Við viljum beita okkur fyrir því að lagður verði hjólastígur milli Keflavíkur og Reykjavíkur,“ segir svo líka. 

Samfylkingin ætlar sér líka að bæta göngu- og hjólastíganetið og auka forgang þessara ferðamáta á gatnamótum. Rétt eins og Píratar sem ætla að setja hjóla- og göngustíga framar í forgangsröðun. Framsókn er svo enn annar flokkurinn sem vill „öfluga uppbyggingu hjóla- og göngustíga og styður deilihagkerfi í samgöngum“.

Miðflokkurinn styður þetta líka en auk þess ætlar flokkurinn að stórbæta þrif á hjólastígum. 

Í kynntri kosningastefnu Vinstri grænna virðist ekki minnst á hjólreiðar en teiknaða myndin sem prýðir síðuna um samgöngur inniheldur meðal annars hjól. Sósíalistar virðast heldur ekki hafa sérstaka hjólastefnu í kynntum kosningaáherslum sínum né heldur Flokkur fólksins