Fjöl­miðla­fyr­ir­tækið Torg hefur sagt sig úr Samtökum versl­unar og þjón­ustu og þar með úr Samtökum atvinnu­lífs­ins. Ákvörðun þess efnis var tekin með þeim rökum að ekki færi vel á því að fjöl­mið­ill hefði væri aðili að hags­muna­sam­tökum sem hann þyrfti ítrekað að fjalla um í frétta­flutn­ingi sínum. Úrsögnin hefur þó ekki tekið gildi ennþá sökum þess að upp­sagn­ar­frestur er á slíkum upp­sögnum. Jón Þórisson, for­stjóri Torgs, segir það sér­kenni­legt og ekki í góðum takti við lög um félaga­frelsi.

Ákvörð­unin var tekin að frum­kvæði Jóns sem seg­ist hafa um all langt skeið hafa haft efa­semdir um rétt­mæti þess að fyr­ir­tækið væri aðili að hags­muna­sam­tökum sem þessum. „Það var aðal ástæðan, við gerum engar athuga­semdir við starf­semi þess­ara sam­taka enda hefðum við þá komið því á fram­færi ef það hefði verið. Fyrst og fremst er þetta vegna þess að okkur finnst ekki fara vel á því að fjöl­mið­ill eigi hags­muni í hags­muna­sam­tökum, ef svo má segja, en þurfi svo kannski að geta fjallað um þau og skýrt frá ýmsum málum þeim tengdum. Við viljum ekki vera undir þá sök seldir að vera mögu­lega með ein­hvers konar bias í þeim efnum.“

Sem fyrr segir mun úrsögn Torgs ekki taka gildi strax og gagn­rýnir Jón það ráðslag í sam­þykktum Samtak versl­unar og þjón­ustu. „Við höfum til­kynnt úrsögn okkar en hins vegar eru regl­urnar þannig að það er ákveð­inn upp­sagn­ar­frestur, hálft ár eftir að upp­sögnin berst. Við erum því ekki gengin úr sam­tök­unum en það mun ger­ast í októ­ber næst­kom­andi. Þetta byggir á ein­hverju ákvæði í sam­þykktum, sem að út af fyrir sig er sér­kenni­legt og ekki í góðu sam­ræmi við reglur um félaga­frelsi. Þetta er hálf­gert vist­ar­band.“

Tap síðustu þriggja ára yfir milljarð

Spurður hvort að eitt­hvað fjár­hags­legt hag­ræði geti orðið að upp­sögn­inni fyrir Torg segir Jón að það sé eitt­hvað en þó ekki neitt sem máli skipti í rekstri félags­ins. Félags­gjöldin séu hlut­fall af launa­kostn­aði og veltu fyr­ir­tækja og það ráði ekki neinum úrslitum í rekstri Torgs. Það hafi því ekki verið áhrifa­þáttur í ákvörð­un­inni.

Gildandi kjara­samn­ingur Blaða­manna­fé­lags Íslands við Samtök atvinnu­lífs­ins rennur út í lok októ­ber næst­kom­andi og því ljóst að kjara­samn­ings­gerð mun hefj­ast áður en úrsögn Torgs tekur gildi. Jón segir að það muni ekki breyta miklu í kjara­samn­ings­gerð­inni. „Ég reikna með að við fram­seljum ekki lengur samn­ings­um­boðið heldur önn­umst samn­inga­gerð­ina sjálf. Það verður auð­vitað, eins og alltaf er, í takt við það sem er að ger­ast á vinnu­mark­aði. Þannig að ég held að það breyti fremur litlu.“

Torg ehf. gefur út Frétta­blaðið og Mark­að­inn auk þess að rekar DV og Hring­braut. Á síð­asta ári, 2021, tap­aði félagið 240 millj­ónum króna og árið áður nam tapið 599 millj­ónum króna. Árið 2019 nam tap félags­ins 212 millj­ónum króna og er því tap félags­ins á síð­ustu þremur árum rúmu millj­arður króna.

Á síð­ustu tveimur árum hefur tap­inu verið mætt með því að 900 millj­ónum króna verið veitt inn í félagið með nýju hlutafé úr vasa eig­enda. Helgi Magn­ús­son fjár­festir á 91 pró­sent hluta­fjár í félag­inu í gegnum félögin Hofgarða ehf. og HFB-77 ehf.