„Hann var kátur, léttur og hjartahlýr“

Ólafur Krist­jáns­son lést þann 23. októ­ber síð­ast­lið­inn, en hann var einn af fjöl­mörgum skjól­stæð­ingum Frú Ragn­heiðar. Gallery Port stendur nú fyrir upp­boði til styrktar Frú Ragn­heiði, þar sem ljós­mynd af Ólafi, eða Óla eins og hann var almennt kall­aður, verður boðin upp. Uppboðið stendur yfir í eina viku, frá 15. des­em­ber til 22. des­em­ber.

Ljós­mynd­ina tók Þór­steinn Sigð­urðs­son, sem kynnt­ist Óla við gerð ljós­mynda­verk­efn­is­ins Container Society, þar sem hann fylgdi eftir tveimur íbúum í svoköll­uðu smá­hýsa­hverfi fyrir hús­næð­is­lausa á Granda, þeim Óla og Gumma. Óli bjó í smá­hýsa­hverf­inu um ára­bil.

„Þetta snertir okkur öll og við þurfum öll að hlúa að þessum hópi“

Upp úr verk­efn­inu spratt bæði bók­verk og ljós­mynda­sýn­ing í Gallery Port sum­arið 2018. Óli mætti á opn­un­ina og vakti að sögn eig­enda gall­er­ís­ins mikla athygli við­staddra. Ein­hverjir báðu hann um að árita fyrir sig bækur sem honum þótti bæði skemmti­legt en einnig dálítið ein­kenni­legt.

Óli áritar bókÞað kom Óla skemmti­lega á óvart að list­unn­endur báðu hann um að árita fyrir sig ein­tak

Mynd: Kamil Grygo

Hjartahlýr og vel gerður maður

Þór­steinn minn­ist Óla sem hjarta­hlýs manns sem kall­aði hann alltaf elsk­una sína. „Minn­ingin er þannig að hann var kátur, léttur og hjarta­hlýr. Hann tal­aði alltaf fal­lega um annað fólk og var alltaf bjart­sýnn á fram­tíð­ina. Hann var virki­lega góður maður, auð­vitað öðru­vísi en flestir en hann átti við fíkni­vanda að stríða sem lit­aði líf hans að stórum hluta. Þegar maður leit fram hjá því sá maður ótrú­lega góð­hjart­aðan og vel gerðan mann. Við vorum miklir vinir.“

 „Þetta eru allt bræður okkar og systur“

Að sögn Þór­steins var Óli ör ein­stak­lingur og alltaf að sýsla eitt­hvað. Það hafi gert það að verkum að oft var erfitt að ná af honum mynd. Á mynd­inni sem nú er til sölu á upp­boð­inu stendur Óli fyrir aftan íbúð­ina sína í smá­hýs­unum út á Granda. „Fyrir þessa mynd var ég búin að stilla mynda­vél­ina upp á þrí­fót því ég vildi ná ein­hverri hreyf­ingu, mynd af honum að sýsla. Á mynd­inni er hann ekki að horfa í mynda­vél­ina svo þetta er ekki hefð­bundið por­tett. Ég myndi frekar flokka mynd­ina sem umhverfispor­trett, það er að segja, Óli er ekki eina aðal­hlut­verkið í mynd­inni heldur er smá­hýsið, gámur­inn, í aðal­hlut­verki líka svo þetta bland­ast saman í kröft­uga heild. Mér finnst vera mikið afl í þess­ari mynd, bæði varð­andi strúkt­úr­inn, hreyf­ing­una en líka það að hann skuli vera með hend­ina á hjart­anu.“

Góð­hjart­aður maðurÁ útgáfu fögn­uði bók­verks­ins Container Society náð­ist mynd af þeim Þór­steini, Óla og Gumma saman

Mynd: Kamil Grygo

Ómetanlegt afl

Samtökin Frú Ragn­heiður segja Þórstein hafa verið ómet­an­legan í lífi Ólafs Krist­jáns­sonar. Því lá vel við að ágóð­inn af sölu mynd­ar­innar myndi renna til sam­tak­ana. Sama hug­mynda­fræði er á bak­við bók­verkið Container Society en ágóð­inn af sölu þess rennur einnig til sam­tak­ana. „Þetta hefur verið ákveðin hringrás,“ segir Þór­steinn og heldur svo áfram.

„Í stað þess að ég fari inn í þessar aðstæður, taki mynd og græði svo fé á sölu bók­ar­innar hef ég notað pen­ing­inn til að gefa til baka í þetta mál­efni.“

Málefnið segir hann mik­il­vægt og að minna þurfi á það oft. „Þetta er mál­staður sem er mik­il­vægt að minna reglu­lega á vegna þess að þetta eru allt bræður okkar og systur, mæður okkar og feður. Þetta erum við. Við getum alltaf lent í erf­ið­leikum eða börnin okkar svo þetta snertir okkur öll og við þurfum öll að hlúa að þessum hóp.“