Hér er þrautin frá í gær, halló!

***

Fyrri aukaspurning:

Skoðið myndina að ofan. Við hvaða tækifæri er hún tekin?

***

Aðalspurningar:

1.   Hvaða íslenski grínisti kemur nú fram á Netflix?

2.   Hvað heita sænska stúlkan sem sló í gegn árið 2019 fyrir baráttu sína gegn hamfarahlýnun?

3.   Hvað er viðurnefni Ingólfs Þórarinssonar?

4.   Hvaða breski kóngur á ofanverðri 18. öld varð geðveikur, að minnsta kosti á stundum?

5.   Sesselja Hreindís Sigmundsdóttir fæddist 1902 og þegar hún var tæplega þrítug beitti hún sér fyrir að ákveðinn hlutur var stofnaður, reistur eða settur af stað. Hvað var það?

6.   Í hvaða landi heitir höfuðborgin Djakarta?

7.   Í hvaða sæti er Ísland á lista yfir stærð eyja í veröldinni – ef Ástralía er ekki talin með? Er eyjan okkar sú 8. stærsta, 18. stærsta, 28. stærsta eða 38. stærsta í heimi?

8.   Geir Vídalín var valinn biskup í Skálholti árið 1796. Hann andaðist 1823. Hvað var helst merkilegt við hans biskupstíð?

9.   Fyrir hvað eru blóðhundar einkum kunnir?

10.   Í hvaða innhaf fellur Níl?

***

Seinni aukaspurning:

Sú var tíð að kóngar og keisarar og aðrar slíkar silkihúfur sóttust eftir að vera myndaðar eða málaðar á stæðilegum hvítum hesti. Það átti að sýna tign þeirra og göfgi, enda fátt glæsilegra en hvítir gæðingar. Þetta hefur dottið svolítið úr tísku, en í fyrra birtist þó slík mynd af ákveðnu fyrirmenni á hvítum stóðhesti. Hver er þarna á hesti sínum á fjallstoppi?

***

Svör við aðalspurningum:

1.   Ari Eldjárn.

2.   Greta Thunberg.

3.   Veðurguð.

4.   Georg 3. Hafa verður númerið rétt.

5.   Sólheimar í Grímsnesi.

6.   Indónesía.

7.   Ísland er 18. stærsta eyja heimsins.

8.   Fyrsti biskupinn síðan í árdaga sem var biskup yfir öllu Íslandi, því hann varð biskup á Hólum ári eftir að tekið við í Skálholti, og svo flutti sameinað biskupsdæmi til Reykjavíkur. Að nefna bara Reykjavík er ekki nóg, fólk verður líka að nefna sameinuð biskupsdæmin.

9.   Mikla þefvísi, sporrakningu.

10.   Miðjarðarhaf.

***

Svör við aukaspurningum:

Fyrri:  Þetta er Bjöggi að syngja lagið Núna í Eurovision 1995. Óneitanlega virðist tilstandið í leikmynd hafa aukist síðan þá. „Bjöggi“ og „Eurovision“ dugar til að fá rétt.

Seinni:  Þetta er Kim leiðtogi Norður-Kóreu.

***

Og aftur hlekkur á gærdagsþrautina.