Salman Tamimi, sem kom til Íslands 16 ára gamall frá Jerúsalem og helgaði líf sitt baráttu fyrir mannréttindum, lést í nótt á friðsælan hátt í faðmi fjölskyldu sinnar.

Salman fæddist 1.mars árið 1955 í Jerúsalem, Palestínu. Hann kom til Íslands 1971. Hann var á sjó og í byggingarvinnu í fyrstu en á seinni árum menntaði hann sig sem tölvunarfræðingur og vann lengst af hjá Borgarspítalanum, síðar Landspítalanum.

Salmann stofnaði Félag múslima á Íslandi árið 1997 og var formaður þess til fleiri ára. Hann var einnig stofnfélagi í Félaginu Ísland-Palestína og var ötull talsmaður réttinda Palestínumanna ásamt því að láta sig varða mannréttindi víða um heim.

Eftirlifandi eiginkona hans er Ingibjörg Tamimi Sigurjónsdóttir. Hann lætur eftir sig 5 uppkomin börn, fósturson og 12 barnabörn ásamt stórri fjölskyldu í Palestínu og á Íslandi. Salman var mikill fjölskyldumaður, vinamargur og verður sárt saknað af mörgum.