Þótt staða talningar í bandarísku forsetakosningum vísi nú til þess að Donald Trump sé að ná endurkjöri, og að hann hafi sjálfur lýst yfir sigri, eru undirliggjandi vísbendingar um honum verði velt úr sessi.

Joe Biden á enn möguleika á því að sigra í ríkjum sem Hillary Clinton tapaði í fyrir fjórum árum, einna helst: Wisconsin, Michigan, Georgíu, Norður-Karólínu og Pennsylvaniu. 

Í öllum þessum ríkjum, nema Wisconsin, hefur Trump fengið meirihluta talinna atkvæða. Í því er þó ekki tekið tillit til þess hvernig atkvæði raðast. Rætt er um rauða hillingu eða bláa hillingu, þegar fyrstu tölur benda til afgerandi sigurs Repúblikana eða Demókrata vegna hlutfallslegrar skekkju í talningarferlinu. Slík skekkja getur myndast þegar utankjörfundaratkvæði eru talin síðar eða þegar sterk vígi annars flokksins eru talin hægar en hin. Það á við um lykilríkin sem Donald Trump má ekki missa ef hann ætlar að vera réttilega endurkjörinn.

Lykilríkin gætu sveiflast

Þannig eru mörg ótalin atkvæði í þéttbýlum svæðum, þar sem Demókratar njóta meira fylgis, bæði í Georgíu, Norður Karólínu, Michigan og Pennsylvaniu.

Í Pennsylvaniu hefur Trump mikið forskot á Biden, með um 55% talinna atkvæða gegn 44% Bidens. Þar á hins vegar eftir að telja mikinn fjölda utankjörfundaratkvæða. Að auki hefur aðeins rúmlega helmingur atkvæða verið talinn í Philadelphiu, þar sem Biden hefur yfirgnæfandi stuðning, og um 70% atkvæða í sýslunni umhverfis Pittsburgh, þar sem Biden hefur einnig meirihlutastuðning. 

Biden getur hins vegar nú orðið forseti án þess að vinna í tæpri stöðu í Pennsylvania, meðal annars vegna þess að hann virðist hafa tryggt sér sigur í Arizona, heimaríki repúblikanans og fyrrverandi forsetaframbjóðandans John McCains heitins, sem var fyrir andlát sitt svarinn andstæðingur Trumps og varð fyrir aðkasti af hans hálfu.

BidenÁ kjörstað í gær.

Mynd: afp

Tekur Biden Michigan?

Sama gildir um fjölmennar sýslur víða annars staðar í lykilríkjunum. Í Michigan hefur Trump 50% stuðning þegar þetta er skrifað, en Biden 48,5%. Þar hefur hins vegar aðeins tæpur helmingur atkvæða í sýslunni í kringum stærstu borgina Detroit verið talinn, en þar hefur Biden mælst með mun meiri stuðning en Trump. 

Í Norður-Karólínu skilur aðeins rúmlega eitt prósent atkvæða að Trump og Biden, en þar eru flest ótalin atkvæði í þéttbýli í kringum Charlotte og Raleigh.

Sömu sögu er að segja af Georgíu, þar sem áætlað er að 20% atkvæða í stærstu borginni Atlanta séu ótalin, sem og í vígi demókrata í Savannah. Á sama tíma eru atkvæði nánast fulltalin í dreibýlli sýslum þar sem stuðningur er meiri við Donald Trump.

Kristján Guy Burgess alþjóðastjórnmálafræðingur segist á Facebook telja að Biden muni vinna kosningarnar. „Sýnist á öllu að þegar öll atkvæði verða talin að Biden nái þessu. Veltur á atkvæðum í Atlanta, Milwaukee og Detroit sem á eftir að telja og Trump vill stoppa talninguna á.“