***
Fyrri aukaspurning:
Þetta málverk eftir franska málarann David sýnir mann nokkurn í þann veginn að fá sér sopa af snotrum vínbikar sem haldið er að honum. Af einhverjum ástæðum virðast allir viðstaddir harmi lostnir, nema helst sá sem er í þann veginn að bragða á víninu. Hvaða maður er það?
***
Aðalspurningar:
1. Hvaða ríki í Evrópu samsvarar (svona nokkurn veginn) rómverska skattlandinu Dakíu?
2. Aðeins einn köttur hefur farið út í geim. Kötturinn lifaði stutta geimferðina af, en dó tveim mánuðum síðar þegar vísindamenn reyndu að fjarlægja rafskaut sem höfðu verið fest við heila kattarins til að mæla áhrif geimferðarinnar á heilastarfsemina. Hvað þjóð fór svo illa með kött?
3. Hvað heitir höfuðborgin í Argentínu?
4. Á dögunum fengu þrír vísindamenn Nóbelsverðlaun í eðlisfræði fyrir brautryðjendarannsóknir sínar á ... hverju?
5. Alfred Mosher Butts hét atvinnulaus bandarískur arkitekt sem fann upp borðspil nokkurt árið 1938, en það hefur síðan farið sigurför um heiminn. Hvaða spil var það?
6. „Heyra má ég erkibiskups boðsskap, en ráðinn er ég í að halda hann að engu og eigi hygg ég, að hann vilji betur eða viti, en mínir foreldrar, Sæmundur hinn fróði og synir hans.“ Þetta er haft eftir íslenskum höfðingja á 12. öld. Hvað hét hann?
7. NaCl. Þetta er efnafræðiformúla yfir algengt efni sem víðast um veröldina er oftar en ekki á borðum fólks. Hvaða efni er það?
8. Í hvaða sjónvarpsseríu undir aldamótin 2000 sló leikkonan Gillian Anderson í gegn?
9. Hvaða leikkona vann á dögunum Eddu-verðlaun fyrir bestan leik kvenna í aðalhlutverki í sjónvarps- eða kvikmynd?
10. Hvað heitir Amma Önd í Andrésblöðunum að fornafni?
***
Og seinni aukaspurning:
Fáninn hér að neðan á sér nokkuð óvenjulega sögu. Hann var einu sinni þjóðfáni í einu ríki en er nú þjóðfáni annars ríkis. Hvaða ríkis?
***
Svör við aðalspurningum:
1. Rúmenía.
2. Frakkar.
3. Buenos Aires.
4. Svartholum í geimnum.
5. Skrafl.
6. Jón Loftsson.
7. Borðsalt.
8. X-Files.
9. Katla Margrét Þorgeirsdóttir.
10. Andrea.
***
Svör við aukaspurningum:
Á málverki Davids má sjá gríska heimspekinginn Sókrates í þann mund að hann þiggur eitarbikar sem hann var dæmdur til að drekka af. Hann hafði verið dæmdur til lífsláts fyrir að spilla æskulýðnum.
Á neðri myndinni má sjá fána Taívans sem var fáni Kína áður en kommúnistar náðu þar völdum árið 1948.
***
Og aftur er spurt: Hvar er þrautin frá í gær? Jú, hún leynist hér!
Spurningaþrautin
Fyrri grein
172. spurningaþraut: Dularfull stjórnleysingjasamtök, dularfull glæpasaga, dularfullur byltingarleiðtogi og fleira dularfullt
Næsta grein
Athugasemdir