Strætó bs. hefur frá árinu 2010 aðeins keypt tvo strætisvagna sem knúnir eru áfram með metangasi. Árið 2010 var tekin ákvörðun í stjórn Sorpu bs. um að hefja uppbyggingu gas og jarðgerðarstöðvar í Álfsnesi, stöðvar sem á að framleiða nægilegt metangas árlega fyrir á bilinu 6 til 8 þúsund bifreiðar. Bæði fyrirtækin eru byggðasamlög í eigu sveitarfélaganna á höfuðborgarsvæðinu og svo virðist því sem stjórn Strætó hafi litla trú á metangasi sem framtíðar eldsneyti fyrir flota sinn.

Frá ársbyrjun 2010 hefur Strætó keypt 59 strætisvagna, tvo metanvagna sem fyrr segir, fjórtán rafknúna vagna og 43 díselknúna vagna. Í svari Strætó við fyrirspurn Vigdísar Hauksdóttur, áheyrnarfulltrúa Miðflokksins í borgarráði, kemur fram að miðað við útreikninga á 10 ára líftíma, við útboð árið 2017, hafi rafmagnsvagnar verið hagkvæmasti kosturinn, jafnvel þó þeir séu um þriðjungi dýrari en metanvagnar.

Reynslan af metanvögnum ekki góð

Í ítarlegri umfjöllun um málefni jarðgerðarstöðvarinnar GAJA í Stundinni í maí síðastliðnum kom fram að Strætó myndi ekki ráðast í frekari kaup á metanvögnum fyrr en búið yrði að bæta innviði fyrir metangas á höfuðborgarsvæðinu. Um 40 mínútur taki að fylla hvern vagn, aðeins sé ein metanstöð sem hægt sé að notast við og hún sé uppi á Bíldshöfða, fjarri höfuðstöðvum Strætó, sem sé mikill ókostur þar eð fylla þurfi á vagnana á nóttunni. Þá sé reynslan af metanvögnum ekki góð, einkum eigi það þó við um tvo eldri vagna en þeir tveir aðrir sem Strætó eigi og voru keyptir eftir 2010 hafi þó reynst betur.

Það metangas sem ekki nýtist sem eldsneyti á bíla, en skráðir voru 1.333 slíkir á landinu öllu á árunum 2009 til 2018, er brennt án þess að nýtast til nokkurs.

Vigdís segir Strætó vera tilraunadýr

Á fundi borgarráðs var svar Strætó lagt fram. Vigdís lagði þar fram bókun þar sem hún taldi stórfurðulegt að á sama tíma og unnið hefði verið að verulega aukinni framleiðslu á metani hjá einu fyrirtæki borgarinnar, Sorpu, þá virtist annað fyrirtæki borgarinnar, Strætó, engan áhuga hafa á að nýta það sama metan. Enn sé keyrð sú stefna að fest kaup á díselvögnum sem mengi sem mest.

Þá benti Vigdís á í bókun sinni að Össur Skarphéðinsson, fyrrverandi formaður Samfylkingarinnar og utanríkisráðherra, væri stjórnarformaður fyrirtækisins Yutong Eurobus Scandinavia AB, umboðsaðila rafmagnsvagnanna sem Strætó hefði keypt. „Hagsmunirnir eru það miklir fyrir umboðsaðilann að Strætó bs. er tilraunadýr fyrir markaðssetningu vagnanna á Norðurlöndunum og Reykjavíkurborg undir stjórn Dags B. Eggertssonar tekur þátt í því.“

Í gagnbókun borgarráðsfulltrúa meirihlutans í borgarráði segir að kaup á rafmagns og metanvögnum frá árinu 2016 séu hluti af umhverfisstefnu Strætó, sem geri ráð fyrir kolefnishlutleysi árið 2030. Aðeins einn díselvagn hafi verið keyptur síðan 2016 og því veki ummæli Vigdísar furðu. „Í sömu andrá er gagnrýnt að keyptir séu inn rafmagnsvagnar og dylgjað um að um stórt samsæri Samfylkingarinnar með Kínverjum sé að ræða.“

Vigdís segir í samtali við Stundina að staðreyndir séu ekki samsæri. Össur starfi fyrir Youtong Eurobus Scandinavian AB, og sé flokksfélagi Dags B. Eggertssonar borgarstjóra. „Þetta lyktar af spillingu.“